De schadt-kiste der philosophen ende poeten

[p. 282]

Nievw liedeken; op de wyse:
Als die reyn liefde vierigh;

D'menschen sijn gheneghen

Verscheyden end vreemd
Selden ist te deghen
D'een ghenuchte neemt
Baechum te ver-eeren
Al soud' hy in Circe cot
Als Elpenor leeren
Spelen den Grillighen sot.

Ander Venus achten

D'licht vaerdighe minn
Vlien Auroraes krachten
Hanghen hert en zinn
Daghen weken ueren
Aen Cupido 'toncuys bloed
Datmen met besueren
Dick schandigh betalen moet.

Als Nox comt te lande

Sulcke meest lust heeft
Sommighe met den brande
VVelcke Iuno gheeft
Als Midas goud gierigh
Ontsteken, tot Rijckdomm' dus.
In slickent al vierigh
Met Erisichtonius.

VVeynigh sulcke vresen

Mercurius daed'
Aen Phoebus bewesen
Nochte Battus quaed'
Martias vermeten
Een ghedeelte wel behaeght
Mars werd niet vergheten
By een'ghe hoe bert hy plaeght

Prince.

Soo haest Clotho aerdigh

Ende Lachesis
'T draeyken vord'ren vaerdigh
En daer leuen is
Tot jaren ghecomen
Ghebruijckt Prinsch yder sijn tijd
Nae sin sonder schromen.
Tot dat 't Atropos af snijd.

Pieter Alchas Melchiorszoon.

Practyck mackt Ryck.