De schadt-kiste der philosophen ende poeten

[p. 246]

Nievw liedeken; op de wyse:
Edel Kerssau.

EEn stout ghesicht,
Vierich int auontueren,
Maeckt my seer amoureus,
Cupidoos schicht,
Brenght mijn jonck hert in trueren,
Om mijn lief gratieus,
Ick loop schandaleus,
Om heur nu achter straten,
Deur Anteros vilonij,
Mach ick niet met heur praten.

Met groot ootmoet,

Ghinck ick Aurora claghen,
Van Anteros dit leet,
Sy namt int goet,
Van my ten seluen daghen,
Al deur mijn traenkens heet,
Sy was haest bereet,
Tot mijnder hulp te comen,
Venus, Iuno, en Pallas,
Heeft sy met heur genomen.

Mercurj ras,

Quam tot my nederdalen,
Om dienstbaerheyt te doen,
Opt seluer pas,
Ghinck hy Diana halen,
En oock veel Goden coen,
Caeres int saysoen,
En wou my niet verlaten,
Flora met heur blomkens schoon,
Quam oock tot mijnder baten.

Noch brocht hy my,

De neghen sangh Goddinnen,
Tot veur mijns liefkens deur,
Daer ghinghen wy,
Vreucht en jolijt beginnen,
Men hoorden geen getreur,
Mijn lief quam doen veur,
Besien wie dat wy waren,
Orpheus met sijn Herp soet,
Die speelden op sijn snaren.

Prince.

Mijn reijn Princes,

Quam heur verjubileren,
En nam my by der handt,
Ick ginck expres,
Met heur danssen hanteren,
Ick creech heur Trou te pandt,
Met t'houwelijcx bandt,
VVorden wy daer gebonden,
Goden en Goddinnen al,
Haddens heur onder wonden.

Wt Vrevcht en Iolyt.