De schadt-kiste der philosophen ende poeten

[p. 225]

Nievw liedeken; op de wyse:
Den tijt is hier datmen &c.

MErcurij snel,, der Godẽ bood'int wesen,
Heeft door beuel,, en Iupiters vermaen,
Sonder vuijstel,, de Goden al int wesen,
Als niet rebel,, sijn bodtschaphen gedaen,
Dat sy alt'samen, vrijmoedich onbelaen,
Elck met sijn liefste caer,
By Iouem, sijn genoot te gaer,
Tot sijn bancquet eerbaer,
Hy salse wel ontfaem.

De Goden al,, dees tijdinghe vernamen,

In groot getal,, elck hem stelde ten t'hoon,
Int soete dal,, van Pegas dat sy quamen,
Met bly geschal,, by Helicon seer schoon,
Daer de fray Musen, tesamen in persoon,
In vreuchde leuen vroet,
Daer op den barch Parnassus soet,
VVaer elck sijn beste doet,
In Musica jdoon.
Dit lieflijck pleyn,, als een lusthof beuõdẽ
Seer net certeyn,, heeft Flora soet verciert
Met bloẽkës reyn,, die ick hier sal vermõdẽ
Als Mageleyn,, Goubloemkens, Gelauriert
Groen Olijftakẽ, waeren daer oock gestiert
By d'eel Peoene fijn,
De Roose soet van reuck deuijn,
Met T'mary Cranselyn,
Christus oogh' gemaniert.

Iris met vlijt,, ginck daer de tafel decken

In cotter tijt,, wert t'banquet opgebracht
Momus tẽ spijt,, moest doẽ vã daer vertrekẽ
Oock haet en nyt die wert daer gãs veracht
Nymphẽ ẽ Najadẽ brachtẽ despijs in pracht
Venus Diane t'saem,
Diende de Goden seer bequaem,
D'welck haer was aengenaem,
En wyselijck bedacht.

Prince.

Orphus die sanck,, seer lieffelijck om hooren

Sijn Herpe clanck,, bouen viool off luyt,
Door Bacchy dranck,, sachmen daer vreucht orboorẽ
Diemen daer schanck,, en dede groot vertuijt
Pan ginck daer spelen, seer lustich op sijn fluijt
Elck daer in vreuchden was,
Dat met sijn liefken op dat pas,
Int lieffelijcke gras,
Doch scheyden ten besluijt.

Liefde Maeckt Eendracht.

Mydt en Lydt.