De schadt-kiste der philosophen ende poeten

[p. 210]

Nievw liedeken op de wyse;
Wilt al ter bruyloft comen, die van Christus vrienden sijt.

VVIlt al commen ter feesten
Die Rethorica bemindt,
En al minst met den meesten
Eendrachtich sijn ghesint,
Oft Mars hem wilde moijen
Al om haer leet te doen,
Laet ons te roepen spoeijen
Der Goden hulpe coen.

Compt Musen alle neghen,

VVilt haer doen sulcken bijstandt,
Ghelijck ghy hebt verkreghen,
V verlost al wt de handt,
Van Pireneus onsachtich,
Die naer v eere stondt,
Neghen Ghesusters crachtich,
Gheleertheyt ghy verwont.

Pallas laet sijn gesonden,

V broeder Perseus stoudt,
Andromeda ghebonden,
Hy verloste onbenout
VVant voor des Serpents spijse,
Soo was sy daer gestelt,
D'welck hy al met aduijse,
Ter neder heeft geuelt.

VVordt die const door boosheden,

Als Philomena ghemaeckt,
Haer tonghe wt ghesneden,
En door Thereus ontschaeckt,
Als is den tijt van vreden,
Soo word haer stemme ghehoort,
Als t'snaechte gaels soetheden,
Tot des minnaers confoort.

Prince.

Haer redenrijcke dichten,

Steenen hert vermorwen can,
Het onverstant verlichten,
T'bleeck wel aen Orpheus dan,
Steenen Boomen en dieren,
T'was hem al onderdaen,
Sonder die Bucchus vieren,
VVant sy die const versmaen.

Godt is meyn Hvlpe.