De schadt-kiste der philosophen ende poeten

[p. 181]

Nievw liedeken op de wyse;
Ick die altijt in brande moet leuen.

ONlancx lach ick vol fantasye
In een prieel seer lieffelijck en schoon
Daer gemoete my doen ten tye
Een Ioffrou gherieffelijck en idon
sy riep laet alle droefheyt varen
En wilt met my vermeyden gaen
Ghelijck als amoureuse karen
Terstont was ick haer onderdaen.

VVy ginghen samen deuiseren

Seer vrymoedich sonder ennich bedwanck
Onder een lind weert om lauderen
Daer Caliope quam en dat eer lanck
Orpheus om oock den gheest verblijen
speelden daer op sijn herpe soet
Om verdrijuen melancolije
Tot lof van Rethorica vroet.

Mercurius quam oock wt minnen

En heeft ons samen een gebodt gedaen
Ghy Musen Goden en Godinnen
Comt onder dees linde weest onbelaen
Venus claer cloeck als de plaijsande
Die sal v daer beschencken siet
Voor die daer beest als de valiande
Spreeckt Retorick en singht een liet.

Elck een was bly al met verlangen

Tot dees bequaem geneuchte plaetsche ras
Rhetorica heeftse ontfanghen
Tot lof de schoon Peoen opt selue pas
Daer nae hebben sy doen begonnen
VVant elck een socht te winnen prijs
Die mijn liefste daer heeft ghewonnen
Alsoo ons Pallas doet bewijs.

Prince.

Prince een Croon lustich en fiere

Hebben sy des dochter opt hooft geset
Gheurocht van den Iongh Lauriere
Ick sach mijn leuen noyt Iueweel soo net
Hier mede soo ben ick ontsprongen
Om t'soet bedrijf datter gheschiet
Den Peoen lof en onbedwongen
Die ick groete met mijn bediet.

IEVCHT MACKT VREVCHT

Door Ian Peters, s'Hertogenbossche.