De schadt-kiste der philosophen ende poeten

[p. 159]

Nievw liedeken op de wyse;
Op een Helena schoon.

COmt Hercules bequaem
Met Laomedon stout,
Brenght Alexanders faem,
Om sijn fortuyne out
Siet nu het hof bedout
Van't schoon Peoentgen nedt,
Daer liefd geensins en flout,
Maer op de conste ledt.

Comt Caius Caesar vry

Met v oorloghen heet,
Asciplius oock bly
In v zeeroouingh wreet,
Pompeius ghy veel leet,
Als men v soo deursteeckt,
VVeest hier noch eens bereet,
Siet wat de const ghebreckt.

Annibal Capiteyn

Carthago doch verlaet,
Scipio vroom Romeyn
In't velt tegens v staet,
Drusius delicaet
Siet Rethorica aen,
Gheeft hier doch goeden raet
Teghen die haer versmaen.

Ghy Mylo reuse groot

Sijt hier te recht van doen,
Den stier Midas strijdt bloot
Op Rethorica coen,
Somtijts d'Laurierken groen
Die wederstaen den stier,
Doet oock soo ghy Peoen
In allen v manier.

Prince.

T'serpent Hydra is doot

Met al sijn hoofden fel,
T'heeft creghen wederstoot
Van Herculem seer wel,
T'moet laeten lijf en vel,
Edel Prince vermaert,
Alsoo blust v ghequel
Als Momus v beswaert.

Bedwinght v Ghemoet.