De schadt-kiste der philosophen ende poeten

[p. 156]

Nievw liedeken op de wyse;
Hoe salich sijn de landen.

DE cloecke lofbaer daden
Van menich vrome helt
En moet men niet versmaden,
Achilles cloeck in't velt
Met Iason wijs voordachtich,
Vlisses was oock crachtich,
Hector in't strijden machtich
Dient hier oock by gestelt.

Men moet oock niet vergeten

Cadmus vroomheyt planteyt,
Die ter neer heeft gesmeten
T'serpent dat was bereyt
Om hem oock te verscheuren,
Maer wat sachmen gebeuren,
Sijn tanden sachmen speuren,
Mans worden daer wt verbreyt.

Hoort oock nae den valianden

Perseum wel bedaecht,
Andromeda wt schanden
Heeft hy gebrocht de maecht,
Die soo vast stont gebonden,
Om te worden verslonden,
Daer hy het monster wonden,
Toonden sijn vlieghens praecht.

Theses dient niet verswegen,

Die Atlas bomgaerdt vant,
En die oock heeft gecregen
Al door sijn cloecke hant,
Sou men sijn daet verhalen,
Die hy deedt princepalen,
Den tijt soude my falen
Al in dat Atheensche lant.

Prince.

Een Prins seer cloeck in't strijden

VVas Hercules vermaert,
Noyt en ginck hy besijden,
Maer stout en onueruaert
Ginck hy sijn leuen wagen,
Brocht Exsona wt plaghen,
Den stier heeft hy verslaghen,
Oock t'serpent seer quaet van aert.

Looft den Heer.