De schadt-kiste der philosophen ende poeten
(1621)–Jan Thieullier–
Auteursrechtvrij
[pagina 145]
| |
Refereyn.
ONder alle gauen die worden ghepresen,
Is die liefde, de charitaet meest wt-ghelesen,
Ter contrarie allen sonden sijn oock groot,
Maer d'een meer als d'ander, wie sal dan wesen
Een onderscheyt maeckende in dees misdaden bloot,
Doch de giericheyt, die de ziele brenght ter doot,
Quetst en deurknaecht den mensch van allen cant,
Ga naar margenoot+ Hier van doet Plato een seer min'lijck exploot,
Die't ghemeyn goet regeren, wordt dees aengheplant,
Dat hy noyt eyghen baet en neemt by der hant,
Want dat's den vyant die wt giericheyt spruyt,
Noyt mensch schadelijcker creatuer en vant
Ga naar margenoot+ Dan den mensch, soo ons Cicero oock ontsluyt,
Aristoteles schrabt de gelt-verquisters uyt,
Om dat sy ziel, en lichaem ghebonden,, houwen,
Wee den vreckaerts, die't gelt houden voor haer bruyt,
Mensch bekeert,, u,, en leert,, nu,, de sonden,, schouwen.
DIe daer met groote giricheden sijn besmet,
En ouertreden niet alleen dees heeren wet,
Maer haer ondersaten sy't vel af-knaghen,
Ga naar margenoot+ Socrates siende dattet gout is een net,
Heeft sijnen schadt en gout in de zee ghedraghen,
Segghende, de ghierighe tot een mishaghen,
O verleydende rijckdom, ghy moet verdrincken,
Eer dat ghy my verworght in dees mijn daghen,
Ghy ghierighe, oft ghy dit wilde bedincken,
Die men met ander lieden goet siet blincken,
Daer u siele aen worght, en comt gheheel tot niet,
Desen ouden Philosooph comt u aen-wincken
Met een leeringhe, seer wel van hem verspiet,
Loflijcken Socrates, hier in gheen draeyent riet,
Ghy saecht hoe't gelt can veel swaer wonden,, douwen,
Iae een peste is, die weenich wordt gheuliet,
Mensch bekeert,, u,, en leert,, nu,, de sonden,, schouwen.
| |
[pagina 146]
| |
Ga naar margenoot+ DEn oirbaer mach teghens d'eerbaerheyt niet strijden,
Daer dees twee sijn, moet ghiericheyt ter sijden,
Want sy als twee ghesusters sijn in een accoort,
Ga naar margenoot+ Socrates plachse te vermaledijden,
Die dees twee ghesusteren maeckten ghestoort,
Hoe comt dat ghy vreckaerts in boosheyt gaet voort,
Ga naar margenoot+ Siet Zeno seyt, ghy sijt tot eerbaerheyt gheboren,
En Aristoteles nae dees reden oock spoort,
Die heeft haer bouen al d'ander vercoren,
Wee u, die soo verweckende sijt Godts thoren,
Wacht u, want den afgront is voor u bereyt,
Ghy steeckt in u ziele eenen grooten doren,
Om een cleyn tijdelijck ghewin ghy erbeyt,
De heydenen hebben ander netten ghespreyt,
Wilt van u dees bijtende honden,, stouwen,
Eest hier naer uwen wil, ghy't naemaels beschreyt,
Mensch bekeert,, u,, en leert,, nu,, de sonden,, schouwen.
| |
Prince.
Ga naar margenoot+ VVYsheyt is een Princes van alle deuchden vroet,
Maer de ghiericheyt staet den regenten, die't doet,
Bouen al te schouwen edel Prince voorwaer,
Daer ghiericheyt niet en domineert, is ootmoet,
Eendrachticheyt der borghers, is daer openbaer
Ghiericheyt verweckt woecker, wy sien't allegaer,
En woecker brenght tweedracht in allen manier,
Ghy die noch gaet met t'pack van ghiericheyt swaer,
Keert wederom, niet dat ghy u goederen hier
Met Socrates sult verdrincken goedertier,
Maer deelt dat den ermen, t'sal u ziele baten,
Dan sult ghy verdienen den crans den Lauwerier
In de glorie Godts, schoon bouen maten,
Ghiericheyt moeten laten alle staten,
T'rijck Godts wilt met u ghegeuen ponden,, bouwen,
Dan en sal Godt u ghiericheyt niet haten,
Mensch bekeert,, u,, en leert,, nu,, de sonden,, schouwen.
Svbtylheyt voor Ghewelt. |
|