De schadt-kiste der philosophen ende poeten

[p. 147]

Nievw liedeken op de wyse;
O maghet schoon mijn hert bemint.

COmt Clio, Thalia, te gaer
Tot wetenschap der const gheneghen,
Euterpe pijp en fluyt eerbaer,
Met Tercxsicore onuersleghen,
Erato heeft een const vercreghen,
Van d'lant meten, t'dient hier verbreyt,
Calliope ontfanght den seghen
Van de conste der gheleertheyt.

Vrania v niet en spaert,

D'Astrologi is nu bequame,
Polymnia heel out bejaert,
Brenght hier een Nympha sonder blame,
Rethorica is haeren name,
Een goddinne der const perfeckt,
Voor Midas ick my niet en schame,
Sy heeft my tot haer liefd verweckt.

Comt oock Ceres, niet langh en toeft,

Verlaet de veldekens met coren,
Al heeft Iuno den gheest bedroeft,
Arachne heeft d'weuen verloren,
Al heeft Inuidia ghesworen,
Dees suyuer const t'brenghen tot niet,
t'Peoentgen vroet is nieu herboren,
Soo elck een op haer feeste siet.

Soo trou als Thisbe voortijts was,

En liet om Piramo haer leuen,
Oft als Dido om Eneas
Oft Penelope weert verheuen,
De trou en heeft haer noyt begheuen
Tot Vlisses haer man en heer,
Soo trou ben ick altijt ghebleuen
Tot dees maecht Rethorica teer.

Prince.

Daphnes boomken den Lauwerier

Doet v Prince deur Pallas groeten,
Mercuri en Minerua hier
Deur liefd' sullen sy v ontmoeten,
Comt Selden Rust, wilt wat versoeten
Om Rethorica d'eerbaer maeght,
VVilt met de Iughen wel deur-vroeten
De wercken veel, dat niemants claeght.

Svbtylheyt voor Ghewelt.