De schadt-kiste der philosophen ende poeten

[p. 144]

Nievw liedeken op de wyse;
Den Prins die had doen maeken een Brug al ouer d'schelt.

COmt helpt my nu vereeren
Ghy Musen groot van moet,
VVilt uwen dienaer leeren,
Met wijse sinnen vroet,
Compt Calliope soet,
Brenght Minerua verheuen,
Vwen schadt open doet,
Dat ick v lof mach gheuen.

Comt Apollo manierich

Al met Orpheus gheclanck,
VVant ghy sijt goedertierich,
Brenght hier Pallas eer lanck,
Ick sal't v weten danck,
Laet Polijmnia mede,
VVant sy en is niet cranck,
Maer thoont hier vrolijcheden.

Goddin Diana claerlijck

VVilt raschlijck gaen ter jacht,
Atalanta eenpaerlijck
Nae Hippomenem wacht,
Loopt vlijtich, doet v macht,
De appelkens verguldich
Sullen v helpen sacht,
En weest niet onuerduldich.

Aurora soet van wesen,

Met Phoebus straelen net,
V schoonheyt wtgelesen,
Allen droefheyt verset,
Comt Atlas in't perket
Deur Perseus grootdadich,
Op Andromeda let
Rethorica beradich.

Prince.

Siet dees Princes vol trouwen,

De Peoen wel gedaen,
Die dese feeste houwen,
En wt liefde bestaen,
Rethorica comt aen,
VVilt hier vastelijck blijuen,
En leeren goet vermaen,
VVaer deur liefde mach stijven.

Raet voor Daet.