De schadt-kiste der philosophen ende poeten
(1621)–Jan Thieullier–
Auteursrechtvrij
[pagina 142]
| |
Refereyn.
WIe sal wt-spreken de loflijcke daden,
De gratien Godts, voor de goede en quaden,
Iae Christenen, heydenen, elck een ghegeuen,
Beuinde bouen al, sonder versaden,
De heydensche Philosophen in haer leuen,
Wat hebben dees met hen verstant niet bedreuen,
Tot veel beschaemtheyts der Christenen ons gheleert,
Bouen al ander deucht hebben sy beschreuen
De eendrachticheyt by haerlieden ghe-eert,
Prijsende d'ouerheyt, die hem lieflijck keert
Tot der ghemeynten, midts oock d'ondersaten,
Die haer ouerhooft eeren, waer deur liefd' vermeert,
Ga naar margenoot+ D'welck Cicero tuycht, prijst haer bouen maten,
Daer dees twee een sijn, wie salse moghen haten,
Soo ick met exempels sal bethoonen wel bedacht,
Dies men wel mach segghen tot Nederlants baten,
Eendracht,, maeckt macht,, vrede sacht,, discoort versmacht,
Ga naar margenoot+ SOo wie het ghemeyn goet sullen regeren,
Moghen twee leeringhen van Plato niet ontberen,
D'een dat sy der ghemeynt proffijt soecken moeten,
Eyghen baet ontwijcken, weert om blameren,
Dander, dat sy't gheheel lichaem versoeten,
In weluaert besorghen, jae handen en voeten,
Want noodich waer, daer voor stellen te pant,
Ga naar margenoot+ Maer seyt Plato, die anders ligghen en vroeten,
Die verwerpt, en hout hem voor uwen vyant,
Weest soet van leuen, gaet wel voor sonder schant,
Ga naar margenoot+ Ghelijck Socrates, Pythagoras, sonder nijt,
Sy worden daer deur gherespecteert in haer lant,
Dan siet men dat Godt den mensch ghebenedijt,
Socrates seyt sijn discipulen t'alder tijt,
Ga naar margenoot+ Heus, stil te sijn, twee jaer, sonder spraeck oft aenclacht,
Een leeringh' voor allen ghemeenten wie ghy sijt,
Eendracht,, maeckt macht,, vrede sacht,, discoort versmacht.
| |
[pagina 143]
| |
DEur't dissimuleren, en heus van monde groot
Wordt een ghemeente sterck, jae haer ouer-hoot
Is haer beschermende voor sweert, water, en vier,
Comt hier Marcum Curtius, die u leuen bloot
Te niet doet, deur liefde in allen manier,
Ga naar margenoot+ Ghy blust der Goden gramschap, om d'eendracht hier,
De Romeynen worden verlost van haer plaghen,
En ghy hooftman Titus, een rechter goedertier,
Die u sone doet steruen, swaer om verdraghen,
Ga naar margenoot+ Om dat hy u ghebodt brack, hebt ghy mishaghen,
Ghy doet hem steruen, hoe wel hy victori wint,
Sulcx en doet justitia niet verjaghen,
Die van allen Philosophen werdt bemint,
Pithagoras seyt, weest heus wat ghy begint,
De heusheyt wordt gepresen, hier doch op acht,
Werpt van u grammoedicheyt, die de deught verblint,
Eendracht,, maeckt macht,, vrede sacht,, discoort versmacht,
| |
Prince.DAer Nero teghen de ghemeente wil opstaen,
Sal het Prouincie met bloetstortingh' vergaen,
Maer daer Marcum Aurelium is in-gestelt
Als een cloeck Keyser, die elck een doet vermaen,
En ghy ghemeentenaers, die u lichtelijck quelt,
Siet hier oock u fouten met Plato ras versnelt,
Weest goedertieren, tot de eendracht u went,
Waerom is ons Belgica soo neder gheuelt,
Ga naar margenoot+ Dan om de sonden, die men soo luttel bekent,
Waer vint men nu Damon, oft Pythia ontrent
D'oprechte ghetrouwicheyt is al vergeten,
Ghy heydensch Philosophen ons te bouen bent,
Met leeringhe hebt ghy uwen tijt versleten,
Te recht heeft dan de Peoen nu laeten weten,
Die met volle eendrachticheyt is sonder pracht,
Dies ick Prince om dit stellen was gheseten,
Eendracht,, maeckt macht,, vrede sacht,, discoort versmacht.
Raet voor Daet. |
|