De schadt-kiste der philosophen ende poeten

[p. 138]

Nievw liedeken op de wyse;
O Maghet schoon mijn hert.

COmt Vlisses en Ajax groot,
Met v sprekende monden goedich,
Die Griecken wachten reden bloot,
Cicero sal v helpen vroedich,
Quintilianus oueruloedich
En sal hier niet wijcken van cant,
Maer schout twiste, tweedracht hoochmoedich.
VVant sy bederft soo mennigh lant.

Comt Apollo Mercuri siet,

Brenght Orpheus met sijn instrumenten,
Speelt melody, maeckt gheen verdriet,
VVilt alle harmony in prenten,
Siet des genuchte inde lenten,
Die v sal maecken vreuchden al,
Comt Calliope schenckt presenten,
Om louen der Musen getal.

Comt Penelope seer eerbaer,

Vlisses moet ghy noch verwachten,
Al is v herte noch soo swaer,
Met suchten ouerbrenght veel nachten,
Al sijt ghy met diuersch' gedachten,
Ten mach v doch noch helpen niet,
Eolus sal den druck versmachten,
Als Iupiter hem dat ghebiet.

Comt oock Perseus heere coen,

Die v vyanden hebt verslaghen,
Comt Iason midts v liefde groen,
Medea sal wel sorghe draghen,
Om't gulde vlies naer v behaghen,
Al waeght ghy v jonghe lijf,
VVeest wel gemoet, en wilt niet claghen,
Ghy crijght het vlies deur haer bedrijf.

Prince.

Daphnes boomken Apollo fijn,

Sy sullen minlijck accorderen,
T'moet al ten lof de Peoen sijn
Al wat ghy lust, naer v begeren,
Hier en sal niemanden manckeren,
Rethorica die maeckt v vry,
Dus sluyt ick dan mijn componeren,
Het sal nu wesen recht ghety.

Doende eynde Ick.