De schadt-kiste der philosophen ende poeten

[p. 126]

Nievw liedeken op de wyse;
T'is om u suyuer Greyne.

GAet wt, wilt v vermeyen
Lancx berghen en valeyen,
In desen Meys saysoen,
De Nymphen haer bereyen
In bosschen en op heyen,
Om tot gheneucht te spoen.

Aurora comt eerbaere

Aen den hemel voorwaere,
En dat s'morghens seer vroech
De dierkens paer en paere
Comen dan oock te gaere
Met een vrolijck gevoech.

Phoebus waghen verheuen

VVort seer lustich gedreuen,
En gheeft sijn straelen schon,
En al dat daer mach leuen,
Comt sy vruchtbaerheyt geuen,
Seer lieffelijck ten thoon.

Boreas wreet en steure,

Die ons hielt in't ghetreure,
VVerdt nu niet meer gehoort,
Maer Flora soet van geure,
Door haer suyuer nateure
Brenght veel geneuchten voort.

Prince.

Prince wilt v verblijen,

En ongheneucht af-snijen,
Dan houdt met Selden Rust,
Comt pluckt aen allen sijen,
Peoenkens sonder mijen,
En al met grooten lust.

In Viericheyt Groeyende.

Al doende Leertmen.