De schadt-kiste der philosophen ende poeten

[p. 108]

Nievw liedeken op de wyse;
Den winter cout die ons seer quelden.

DEn coelen Mey groen van coleure
Die al dat leeft verheugen doet
Staet nu seer schoon in sijnen fleure
Door Phoebus stralen claer en soet
Boreas cou,, verandert nou
In soeten dou,, en bloemkens schoon
Die ons Aurora stelt ten thoon.

Appollo Godt der medecijnen

Doet nu sijn cruijden groeyen snel
Die alle qualen smert en pynen
Door hare cracht genesen wel
Diana gaet,, nu vroech en laet
Nae het wiltbraet wtiagen stout
Door bergh en dalen in het wout.

Pan Godt der heerderkens verheuen

Drijft nu sijn schaepkens op de hey,
Daer sy met rust en vreughden leuen,
En vinden een bequame wey,
Vulcanus vier moet nu van hier,
Door het playsier van Phoebus schijn,
Die elck verheucht op dit termijn.

Ceres gaet nu haer kooren seyen,

Met neersticheyt en hope vast,
Om metter tijt weder te meyen
Het edel graen dat daer wt wast,
Neptunus vloet,, fel en verwoet,
Is nu vermoet,, van sijn getier
Al door de soete dagen fier.

Prince.

Door Cupido den Godt der minnen

VVordt menich cluchtich fayt bestaen
Hipomenes verlieft van sinnen
VVint Athalantha inde baen
Nochtans men siet,, menich verdriet
Eylaes geschiet,, door Venus cracht
Als Daphne Appollo veracht.

In Viericheyt Groeyende.

Altemet Bly.