De schadt-kiste der philosophen ende poeten

[p. 88]

Nievw liedeken op de wyse;
Ghy lustighe Nymphen spoet v ten dans.

TEn is geen wonder Sisiphus
Dat ghy moet veel lijdens lijden,
Letten v het soet gecus
Van Iupijn, die hem verblijden
Met sijn schoon Egina net,
Ghy hadt geern t'spel belet,
Maer t'wasser laes misset.

Moeste ghy noch bouen dien

Dit gaen aen Asopus clappen,
Die ghy deet sijn dochter sien,
Om dat hy haer sou betrappen,
Maer Iupijn die had t'verstant,
Des by haer in een eylant
Eylaes verandert vant.

Haddet naer uwen wil gegaen,

Ten hemel hadde ghy geulogen,
Ende Iuno doen verstaen,
Hoe dat sy weer was bedrogen,
Maer hy wierp v inde hel,
En gaf Minos straf beuel,
V te castijden wel.

Dwasen clapper wist ghy niet

Hoe dat Momus was geuaeren,
Die men wt den hemel stiet,
En sijn tong niet cond' bewaeren,
Soo oock Soyles den vijleyn,
Die berispten groot en cleyn,
En seluer was onreyn.

Prince.

Prince ginget naer mijnen wil,

Ick wou dat sy alle soo voeren,
Die niet en connen swijgen stil,
En selfs loopen by de boeren,
Moesten sylie alle gemeen,
Als Sisiphus rollen den steen,
Ick wed' men vonter geen.

ECCE GRATIA.

Godt Boven al.