|
| |
| |
| |
Refereyn.
ALs ick aenmerck veelderande mannieren,
Van menschen onder den Philosophen staet,
Soo ben ick verwondert buyter-tieren
Met Aristoteles, want niet om bestieren
En sijn sy van haer voornemen goet oft quaet,
Pythagoras leert en vindt in sijnen raet,
Al dat leuen ontfanght, men niet en sou eten,
Themistocles doode hem seluen metter daet,
Om dat hy den coninck Xerxe int vermeten
Niet en sou stooren, en Thales doet ons weten,
Dat de sielen nemmermeer en steruen,
Aristides was int gheuen soo veruleten,
Dat hy met sijn goet d'aerde niet en cost beeruen,
Diogenes die wilt datmen sal deruen
Alle schaemte, en doen alle oneeren,
Gorgias wilde int lest meer wijsheyt verweruen,
Wie sal alle menschen sinnen verkeeren.
ONder de Philosophen siet mer veel dolen,
Want sy sijn meest van diuersche sinnen,
D'een woonde in bosschen, d'ander in holen,
Schouden soo de menschen en haer scholen,
Wilden daer deur groote wijsheyt ghewinnen,
Empedocles verbrande hem seluen binnen
Den bergh Ethna om sijn leuen te verlinghen,
Mijnde hem seluen ontsterflijck te kinnen,
Anaximenus wilt dat alle dinghen
Sijn begin vande locht nempt, wie salt ghehinghen,
Permenides vloot t'smenschen by-wesen,
Epicurus wilde oock aendwinghen,
Dat wellusticheyt en goet moet sijn ghepresen,
Voor het hooghste goet, en bouen desen
Theophrastus wilt den wijsen leeren
Niet te houwen om niet te worden verknesen,
Wie sal alle menschen sinnen verkeeren.
| |
| |
AL te verkeeren qualijck meughelijck is,
Want ten staet niet al in s'menschen handen,
Alchibiades hielt hem salich ghewis,
Om dat hy welsprekende was rijck en fris,
Xenophilus om te vlien de schanden,
Van de menschen, is als den valianden
Met sijn voornemen in sijn graf ghetreden,
Diogenes vliedende al vanden
Wellust des werelts met sijn naeckte leden
Woonde in een ton, verliet s'menschen seden,
Demas leeringhs wilt oock wel onthouwen,
Wordt ghy somtijts van uwen vriendt ghebeden
Om ghelt te leenen, het sijn mans oft vrouwen,
Sulcx te doene meughen wy wel schouwen,
Want ghy verliest vrient en ghelt met verseeren,
Platonis vriendschap doeghets veel brouwen,
Wie sal alle menschen sinnen verkeeren.
| |
Prince.
PRince wy en willen niet versmaden
Den goeden raet van wijse lieden groot,
Met Anaxagoras wilt doch beraden,
T'quaet laten, en v met wijsheyt versaden,
En als Pericles malcandren in noot
Altijt vriendschap bewijsen totter doot,
Met Isocrates mint alle eerbaerheyt goet,
Schout Timons raet tot het verhanghen bloot,
Volcht Archimedes vinder der consten soet,
Oft als Demosthenes soberheyt vroet,
Theophrastus cloeckheyt laet int herte dalen,
Met Socrates verdraeght, en sachtmoedicheyt doet,
Plotinus deughden machmen wel verhalen,
Democritus lachen nempt binnen der salen,
Heraclitus weenen wilt vermeeren,
Al waren wy als Demetrius ter talen,
Wie sal alle menschen sinnen verkeeren.
Gheleynsen van Schelle.
|
|
Auteursrechtvrij