De schadt-kiste der philosophen ende poeten

[p. 23]

Nievw liedeken; op de wyse:
Den lustelijcken Mey is nu in sijnen tijt.

BOreas nae dat ghy in slaep gheuallen sijt,
Soo gheeft Zephyrus crachten,
Aura die ons oock met coel windeken verblijt,
By daghen en by nachten,
Dus laedt ons liefhebbers eerbaer
Doen ons debuoir wt jonsten claer,
Om dichten fraey niet om vercloecken,
En den prins daer met gaen besoecken.

Neptunus water-godt, doet slaen Triton d'trompet

In Thetis groote rijcken,
Op dat de Zeemaetsens aerdich en daer toe net,
Elck gheest schept deur practijcken,
Dry Aden en Nymphen reyn,
Suyuert den wech der bosschen pleyn,
Satyris wilt het velt parreren,
Daer de constnaers sullen passeren.

O Pan der herders Godt, en Tijtir weest Verheught,

Speelt fraey op dijn scharmeye,
Syringa spaert oock niet v rietpijpken vol jeught,
Diana doet intreye
Met eenich wilt gheuanghen dier,
Ceres en Bachus comt oock hier,
Pomona laedt dijn vrucht verschijnen,
Ganimedes can druck verdwijnen.

Rascht v Mercurius, vlieght lichtlijck ouer al,

Roep s'al die sijn vergheten,
Musen verlaedt nu vrij-willich Helicons dal,
Melpomene vol weten
Singht Metamphions snaergheclanck,
Euterpe roert t'claron seer vranck,
Volcomt gheheel de harmonye,
Op dat elck vliet Melancolye.

Prince.

Princen comt altemael, die gheest hebben ontfaen,

Themis wilt niet afblijuen,
Charitas goedertier, doet hier v soet vermaen,
Pallas wijs fleur der wijuen,
Comt gheeft hier wat dijns wijsheyts raet
Met Iupiter in sijnen staet
Om de Peoen t'helpen vereeren,
Daermen Rhetorica sal leeren.

Hopen en Dvchten.