De schadt-kiste der philosophen ende poeten

[p. **5v]

Mey liedeken

Gesonghen Tot eenen VVil-com van allen de Redenrijcke Blommen, tot de welcke de Peoene te vooren haer Caerten hade wt gesonden.

WAnt nu den soeten Mey is voortcomen raeyn
Die van Maya heeft sijnen name
De Moeder van Mercuri t'poetlijck greyn
En der Goden bode bequame
Sijn Siluanus velden soo groene verfraeyt
Met Floras schoon bloeysel rondtomme besaeyt
Daer herse haren dauwe laet op dalen
En Apollo verwermt met sijnen stralen.

Onder alle dit Bloeysel dat Rhea voeyt

Ben ick ondtploken als Peoene
Die al dese Blommekens seer schoon ghegroeyt
Heb ghenoeyt wt reyn liefde coene
Tot dese mijnder feesten van Reden-rijck
Dus heet ick v welcomen alle ghelijck
Want naer dees comst had ick sulcken verlanghen
Dat my mijn hert ondtsprinckt om v t'ondtfanghen.

Al dijn Edel voeghden met ons oock verblijdt

Princen Hooftliens Dekens Facteuren
Philosophen en Poeten wie ghy sijdt
Constenaren die dicht bespeuren
Sijt al willecome in s'Mechels landow
Ghy roose van Louen mette reyn kersow
Den boeck van Bruxel diemen kent alomme
Het Mari-cransken met de Corenblomme.

Willecom ghy Landt-Iuweelsche Violier

Goudt-blom en tackxen van Olijuen
Ghy Moijses bosch metten Ionghen Lauwerier
Catrinisten die const bedrijuen
Den groeyenden boom binnen Liere vermaert
Met oock het Iennetteken vol soeter aert
Viluorts Goudt-blomken me te deser vren
Weest willecome met al ons gheburen.

[p. **6r]

 

Willecom Christus ooghen in ons beuanck

 

Oock Leli Broeders al te male

 

Arschots terwen bloeysel metten wijngaert ranck

 

Van Leew d'leliken wtten dale

 

Willecom Corenblomken van Thienen me

 

Olijftack van Sint Truijen hout hier oock Ste

 

Mol, Gheel, Helmont, en ghy Hasselsche roose

 

Verheught v nu met ons een corte poose.

 

 

 

Willecom vreugden Blom van Berghen op Soom

 

Cauwoord van Herenthals vol seghen

 

Bredaels bercken rijs metten oraeygni-boom

 

En al die in Brabant gheleghen,

 

Willecomme gheesten, oock wt Vlaender-lant

 

Hollant, en Seelant, die door der liefden brant

 

Ons Feest hebt willen comen vereeren

 

Sijt al willecome k'napen en heeren.

Prince.

En belght u niet ghy Prinslijcke Heeren fier

Al versuijm ick veel camers namen
En al noem icker vele in mijn pampier
Die t'onser feesten niet en quamen
Onkennis dede my dese foute slaen
Dus laetse onghemerckt willigh henen gaen
Om dat ons vrindtschap mach wassen en rijpen
Rechte minnaers sullen selden begrijpen.

Selden Rvst.