Briefwisseling oor Kaapse sake 1778-1792

[p. IX]

Voorwoord

Hoewel die verskillende komitees van die Van Riebeeck-Vereniging altyd uitgeblink het deur die hoeveelheid koöperatiewe inspanning wat aan die Vereniging se uitgawes gewy word, meen ek dat die huidige boekdeel selfs in daardie opsig uitsonderlik mag heet. Nadat dr. Schutte, wat 'n senior dosent in die subfakulteit Geskiedenis van die Vrije Universiteit van Amsterdam is, sy klaargemaakte manuskrip voorgelê het, was daar nog heelwat te doen. 'n Engelse opsomming moes van die hoofteks gemaak word en dr. Schutte se inleiding moes in Engels en Afrikaans vertaal word. Verder moes ander bykomende en verduidelikende materiaal asook die voetnote in Afrikaans vertaal word. Bowendien moes sommige van die annotasies uitgebrei word. Al hierdie take moes met groot haas voltooi word.

Alhoewel ons verskeie onvoltooide manuskripte gehad het, was daar geen manuskrip gereed om vir die 1982-deel te gebruik nie. Daar is dus besluit om dr. Schutte se manuskrip af te rond om te verseker dat ons hierdie jaar 'n uitgawe sou hê. Die feit dat hierdie taak vinnig voltooi moes word, het Raadslede onder groot druk geplaas en almal het gewilliglik hulle deel tot die taak bygedra.

Veral moet ek dr. Anna Böeseken bedank wat, ten spyte van baie ander verpligtings, sonder onderbreking aan die Engelse opsomming van die Nederlandse teks gewerk het totdat sy dit gereed gehad het, maandelank voordat ek gedink het dit moontlik sou wees. My bewondering vir haar nougesetheid en wetenskaplikheid is sonder perke. Dan moet ek ook professor Robertson bedank wat die manuskrip op sy gewone kundige en deeglike manier nagegaan het, wysiginge voorgestel het en bykomende inligting, waar nodig, in die teks en in die voetnote verskaf het en ook voorstelle gedoen het ten aansien van die Engelse vertaling. Professor Roy Pheiffer, sowel voor as na 'n besoek aan die buiteland, waar hy trouens deel van sy verlof bestee het aan samesprekings met dr. Schutte in Amsterdam en Hilversum, het gewilliglik al die vertalings in Afrikaans versorg en daarby ook die inleiding in Engels vertaal. Tydens my afwesigheid oorsee het hy by my die taak oorgeneem om die materiaal wat van die ander medewerkers aan die voorbereiding van hierdie deel binnegekom het, te orden. Hy het toe goedgunstiglik die hele manuskrip in sy finale vorm gekontroleer en by die drukker besorg. By geleentheid het ek en professor Webb en professor Pheiffer sommige van die netelige probleme in verband met hierdie manuskrip in laasgenoemde se kantoor saam sit

[p. X]

en bespreek en ek moet professor Webb bedank vir sy raad en bystand. Die taak om alles te koördineer is grootliks verlig deur die doeltreffende hulp van my eie sekretaresse, mev. J. Sellicks, wat haar ook 'n deskundige getoon het in die ontsyfering en foutlose oortik van handgeskrewe veranderinge wat 'n potensiële bron van verwarring was.

Die proefleeswerk is gedeel deur dr. Böeseken, professor Robertson, professor Pheiffer en ek, aangesien dit verdere vertraging sou beteken het as die proewe na die redakteur, dr. Schutte, in Nederland gestuur moes word. Hiervoor is ek baie dank verskuldig aan hierdie pligsgetroue Raadslede, soos vir al die ander werk wat hul gedoen het.

Die Vereniging mag hom gelukkig ag dat ons sulke toegewyde en gewetensvolle Raadslede het wat ook nog wetenskaplik en entoesiasties is.

Dit is aan hulle ywer, naas dié van dr. Schutte self, te danke dat hierdie boekdeel nou aan die lede van die Vereniging aangebied kan word.

Ons is dank verskuldig aan mnr. Colin Cochrane, Direkteur van die Drostdy-Museum, vir die hulp wat hy met die vier illustrasies verleen het.

Ek moet daarop wys dat die Verklarende Woordelys geensins bedoel is om volledig te wees nie. Die bedoeling is slegs om die lees van die tekste in 'n mate te vergemaklik. Die woorde is gespel soos hulle in die teks voorkom en die betekenisse wat gegee word, is slegs dié wat van toepassing is in die konteks waarin die betrokke woord voorkom.

FRANK R. BRADLOW

VOORSITTER