Sommighe nieuwe schriftuerelicke liedekens
(1599)–Frans vander Straten de jongere–
Auteursrechtvrij
[Folio P5r]
| |
nae de wijse: Ick sal u met vreuchden openbaren een blyde maere.WIlt hooren Vrienden al te samen,
Dit liedt met goet verstant,
Want het is ons bequame,
Om te mercken nu ter hant,
Al zijn wy wijt gheseten,
Van malcanderen hoort te gaer,
Het en dient niet te zijn vergeten.
In dese nieuwe Jaer.
Op de schrifteure te mercken,
Soo ons leert Christus woort,
Het can ons heel verstercken,
Wat men uyt die schrift oorboort,
Al tot een betering van leven,
Cant ons [h]elpen eerbaer,
Soo datmen niet int sneven,
Vallen int nieuwe Jaer.
Om den Heere te behaghen,
Vrienden slaet hier op acht,
Laet ons tot allen dagen,
Doch hauden goeden wacht,
Want die Heere noot ons alle gader,
Tot zijn hemelsche vaer,
En hy is oock onse versader,
In dese nieuwe Jaer.
Daerom moeten wy altesamen,
Leven na Christus leer,
Sullen wy worden bequame,
Behauden by de Heer,
Daer moeten wy na poogen,
Om soo te leven claer,
| |
[Folio P5v]
| |
En hebben Gods woort voor ooghen,
In dese nieuwe Jaer.
Och vrienden hoe goet is ons de Heere,
Dat moghen wy mercken daer,
Soo wy hier nemen een keere
Al van ons boosheyt swaer,
Dat hyse ons wil vergheuen,
Al zijnse bloet root onclaer,
So barmhertich is hy verheuen,
In dese nieuwe Jaer.
Want die den Heere van herte vreesen,
Die is belooft certeyn,
Hier nae dat eewich rijck ghepresen,
Al in des Hemels pleyn,
Aldaer wy vreucht sullen oorbooren,
Al by der Enghelenschaer,
Aenmerct toch vrienden wtvercoren,
In dese nieuwe Jaer.
Want dese blijschap met gheen ooghen,
Noch herten en is verstaen
Noch ooc begrepen onbedrooghen,
Gheen oore ghehoort bequaem,
Want het sal alsulcken vreuchde wesen,
Dat moghen wy lesen daer,
In Esaie by desen,
Al in dit nieuwe Jaer.
Och laet ons op dese vreuchde dencken,
Mijn vrienden delicaet
Die ons die Heere wil schencken,
So wy doen al naer zijn raet,
En op zijn weghen voort treden,
Als lieue kinderen eerbaer,
| |
[Folio P6r]
| |
En wandelen met gherechticheden
Al in dit nieuwe Jaer.
Maer groote benautheyt salder comen,
Over alle Godloosen hier,
t'Sal wesen al sonder schromen,
Al met een groot ghetier,
Gaet ghy vermalendyden,
Al in die pijne swaer
Die pijn sullen sy moeten lyden,
Vrienden int nieuwe Jaer.
Laet ons dit doch ter herten nemen,
Dit groote onderscheyt,
Tusschen den quaden hier beneven,
En den vromen eerbaerheyt,
Want die Heere sal tot haer vertellen,
Gaet van my ghy boose daer,
Int eewighe vier der hellen,
Al in dit nieuwe Jaer.
Vrienden om dit wel te bedencken
Dient ons wel gewaerschaut,
Daer hy ons tot liefden wil schencken
Sijn Rijck dat niet en vercaut,
Want hy is onse Salichmaker,
En oock onse middelaer,
Ons Heer en onse voorspraker,
In dese nieuwe Jaer.
Och broeders en susters altesamen,
Laet ons dit ter herten gaen,
En laet ons al sonder schamen,
Des Heeren woort verstaen,
Want wy naer Christus woorden,
Sullen by der Engelen schaer,
| |
[Folio P6v]
| |
Leven in goede accoorden,
In dese nieuwe Jaer.
Hier mede meyn ick dit te laten,
En te corten mijnen Sang,
Laet ons dit doch ter herten vaten,
Int cort al ist niet lang,
Want het is uyt liefden geschreven,
Wt die schriftuer eerbaer,
Die liefde daer toe ghedreven,
In dese nieuwe Jaer.
En wilt mijn dit doch ten goeden,
Afnemen dit slechte liet,
Want ick en can niet bevroeden,
Dat van mijn wat goets gheschiet,
Wt ons selven wy en vermoghen,
Met een goede gedachte claer,
Laet ons Godts woort hauden voor ooghen,
In dese nieuwe Jaer.
Laet ons malcanderen gedencken
In ons ghevet tot Godt,
Op dat hy ons wil schencken,
Het beste deel en lot,
Want voor malcanderen te beden,
Ghetuycht den Apostel claer,
Want wy zijn altesamen Leden,
In dese nieuwe Jaer.
Al zijn wy wijt gheseten,
Laet liefde niet vercoen,
Malcanderen oock niet vergeten,
Dat is dat beste doen,
En laet ons als des Heeren rancken
Loven en prijsen hem eenpaer,
| |
[Folio P7r]
| |
En van zijn gaven hem te dancken,
In dese nieuwe Jaer.
Die dit Liet heeft gheschreven,
Is selve swack en teer,
Bidt den Heer voor hem verheven,
Dat hy doch mach worden seer,
Een lidt aen des Heeren Lichame,
Daer hy is t'Hooft voorwaer,
Van zijn Ghemeynte bequame,
In dese nieuwe Jaer.
Die aenvechtinghe leert op het woort mercken,
Vrienden de Heere gheef u cracht in alle goede wercken.
☞ ☜ |
|