Sommighe nieuwe schriftuerelicke liedekens
(1599)–Frans vander Straten de jongere–
Auteursrechtvrijnae de wijse: En saudemen sulck een coopmanschap doen, en saumer niet eens op drincken, &c.TOt Godt wil ick al mijnen noot,
Gaen claghen mijn ellende,
Mijn siele lydt soo menigen stoot,
Den strijt en neempt ghen ende,
Hy blijft by my,
Och dat ic my noyt van t'quaet enwende,
Hoe leet ist my,
Hadde ick doch op Christum gesien,
Die my soo diere cochte,
Hy hadde my haest comen bevrien,
Dwelck niemant en vermochte,
Dat dede hy,
Och dat ick noyt het quaet en dochte,
Hoe leet ist my.
Met de sondighe Magdaleen,
Beclaghe ick mijn misdaden,
Och maeckt my doch uyt liefden reen,
Verlost my van den quaden,
Ende my vry,
| |
[Folio O3r]
| |
Van die mijn siele inwendich versmaden,
Hoe leet ist my.
Het is my leet van herten gront,
Dat ick u soo mishaechde,
En ick bekent met mijnen mont,
Dat ick in liefden vertraechde,
Maer Heere van dy,
Met al mijn herte dat ickt beclaechde,
Hoe leet ist my.
Deur u goetheyt en liefde groot,
Heere der Heyrscharen,
Soo waren vercoelt mijn sonden root
Daer ick lach in beswaren,
Met s'Geests Oly,
O Heere wilt my bewaren,
Hoe leet ist my.
God helpt my deur zijn stercke hant
En met zijn goetheyt milde,
Veel vreucht ick in de werelt vant,
Jonckheyt track my naert wilde,
Met herten bly,
Verleyt was ic dat niet veel en schilde,
Hoe leet ist my.
Tot God roepd'ick om hulpe sterck,
Die my uyt Egypten haelde,
Hy dede aen my een heerlick werck,
Mijn schult voor my betaelde,
Alleene ghy,
Maer dat ic soo van u waerheyt faelde,
Hoe leet ist my.
Princelick ghenadich Godt,
Gheeft cracht vroomer te strijen,
| |
[Folio O3v]
| |
Want ick hope voor een slot,
Eeuwich met u te verblyen,
Dit segghen wy,
Ick hope beter toe te sien,
Hoe leedt ist my.
Niet dat totter eeren Godts, ende prijs.
☞ ☜ |
|