Sommighe nieuwe schriftuerelicke liedekens

Een nieu liedeken

op de wijse: Schoon Lief ghy zijt Prijs weert alleyn, &c.

SEer jent, present, staet nu experte,
Den mey Christus ontdaen, wilt hem doch nemen aen,
Hem kent, en went, u nu van herten,
Te gaen, al op zijn baen, volcht niet u eyghen paen,
Maer zijt doch haest beraen,
V tot dees Mey te gheven,
En voort, soo't hoort, daer nae te leven,
Sijn woort, oorboort, dickmaels tot een vermaen.

Ontwaeckt, versaeckt, al swerelts cluchten,

Hebt daer van een afgrijs, met de vijf Maechden wijs,
Genaect, en smaect, van dees meys vruchden,
Den rechten Sielen spijs, dat is den hoochsten prijs,
Want desen Mey propijs,
Can u van als versaden,
Met vreucht, en deucht, is hy beladen,
V Jeucht, verheucht, in s'levens Paradijs.

Ontfangt, aenhangt, dees Mey ghepresen,

t'Wert u gepresenteert, in de schrift hooch geeert,
Hem danct, u cranct, sal hy genesen,
Soo ghy u tot hem keert, met een hert verneert,
Wie soo dees Mey begeert,
Sal hy wel salich weyden,
Dus gaet, aenvaet, hem sonder beyden,
En t'quaet, verlaet, maer dees Meys lof vermeert.

Verblijt, met vlijt, wilt wel door gronden,

Den sin van dit mey Liet, met ernst doch wel doorsiet,
V quijt, altijt, wacht u voor sonden,

[fol. O2v]

 

Wayt niet gelijc een riet, maer dees Mey eere biet,

 

De welck Christus bediet

 

Na desen Prins wilt haecken

 

Sijn gonst, en wonst laet in u maecken

 

Kiest jonst voor const tis wt liefden gheschiet.

 

 

 

Wat helpet al gheclaecht,

 

Soo het Godt behaecht.

   ☞   ☜