Sommighe nieuwe schriftuerelicke liedekens
(1599)–Frans vander Straten de jongere–
Auteursrechtvrij
[Folio L5r]
| |
Nae de wijse: Mochtmen om niet drincken, vaet mijn bediet, &c.LIefde en accoort,
Wenschen wy ongestoort,
V vrienden soo t'behoort,
Door een ionstich gemoet,
Tot deuchden spoort,
Waer ghy zijt, Suyt ofte Noort,
Leeft recht naer Godts woort,
In eenicheyt seer soet,
En metter spoet,
Altijt het beste doet,
Weest hertelick ghegroet,
Al door dit cleyn vermaen,
Want tis uyt jonsten reyn,
Al is de conste cleyn,
Wt liefden ist ghedaen.
Eenich ghesint,
Weest doch vrienden bemint,
Groote ghenade vint,
Die de Vrede voort bringt,
Maer naer Schrifts onvint,
Diet hier al overwint,
Sal wesen Christus Kint,
Dus u vant quade dinckt,
En recht door drinckt,
Naer eenicheyt verlint,
Wie dit leest ofte singt,
Willet int goede ontfaen,
Dit ist uyt jonsten reyn,
Als is de conste cleyn,
Wt liefden ist ghedaen.
| |
[Folio L5v]
| |
In liefde claer,
Blijft vrienden allegaer,
List en twist on-eerbaer,
Schaut eertrijck als slick,
Volcht Christum naer,
En vreest gheen lyden swaer.
Ons Hooft ende Pijlaer,
Is hy seer autentijck,
Sijn rijck publijck,
Winnen sy alle ghelijck,
Die hier sonder afwijck,
Totter doot blyven staen,
Ontfangt ons jonste reyn,
Al is de conste cleyn,
Wt liefden ist ghedaen.
Der Liefden brant,
En den eenigen bant,
Haude die Overhant,
In uwer herten meest,
Hope valiant,
Door t'geloove constant,
Sy by u abondant,
Hier in dit wilt foreest,
V niet en vreest,
Voor het ghecroonde Beest,
Den geest vol keest,
Haut u op d engebaen,
Dit is ons jonste reyn,
Al is de conste cleyn,
Wt liefden ist ghedaen.
Een Christen fijn,
Die moet op elck termijn,
| |
[Folio L6r]
| |
Vreetsaem van herten zijn,
Tuycht ons die schrefteur ient,
Heylighen schijn,
Schijnen ghelijck fenijn,
En aen den rechten Lijn,
Hauden tot inden ent,
Om geen torment,
Wijckt niet vant fondament,
Godts woorden excelent,
Prent nu ter herten saen,
Ontfangt ons ionste reyn,
Al is de conste cleyn,
Wt liefden ist ghedaen.
Neempt onsen sanck,
Voor een oorlof in danck,
Al ist ghesant niet lanck,
Wt liefden ist gheschiet,
Jonste die dranck,
Den geest vierich ontspranck,
Wt herten vry en vranck,
Dus wel den gront insiet,
En wanckelt niet,
Ghelijck het wilde riet,
Neempt danckelic dit liet,
En blyft bevolen Godt,
Nu nae t'betamen recht,
Te samen Amen seght,
Vriendekens voor een slot.
Nae een goet leven, compt een goet sterven.
☞ ☜ |
|