Sommighe nieuwe schriftuerelicke liedekens
(1599)–Frans vander Straten de jongere–
Auteursrechtvrijop de wijse van den 23. Psalm.Hantreycking' en ghenade wilt my gheven,
God in goetheyt en macht seer hoch verheven
V maysteyt dat ic te recht mach prijsen,
En metter daet goe danckbaerheyt bewijsen,
Voor al die schoon en heerlicke weldaden,
Van u ontfaen o fonteyn der genaden.
Nacht ende dach dat ic mach overweghen,
Met een ghemoet ganschlick daer toe, genegen,
V goetheyt groot, en die louen te deghen,
Dat ick van u de kennis heb ghecreghen,
Om nae u wil goet ende welehaghen,
Te dijenen u al mijnes levens daghen,
Reyn onbelet van des waerheyts vyanden,
Doet dat ick u hier diene in dees landen,
Alwaer ick nu in vryheyt bin ghecomen,
Soo dat ick geen vervolch behoef te schromen
Gaer van ghy my genadelijc hebt gaen vrijen,
| |
[Folio J4v]
| |
Doet doch dat dit ten besten mach gedien.
Out ende Jonck van dijne uyt ghelesen,
Behoeven nu niet alsoo seer te vreesen,
Vyanden quaet, die t'Lichaem willen quellen,
Maer veel meer die den mensch' brengen ter hellen,
Als duyvel en werelt met vleesche lusten,
Daer teghen elck Christen hen wel moet rusten.
Soo wanneer als s'lichaems vyanden swijgen,
Gemeenlic dan d'andre victori crijgen,
Als d'mensch is vry van des lichaems benauwen,
Sietmen hem veel tijts in het goet verflauwen,
Dus bidt ick Heer met ootmoediger stemme,
Doet dat ic dees vyanden te recht temme.
Doch doet my nu daerom seer wacker waken,
Dat dees vryheyt my niet sorchloos gae maken
Dat met het Vleesch deur s'werelts schoon aenschauwen,
Werd' lustich, en doe de liefde berauwen,
Dat ic den Leeuw die my soo gaet bespijeden,
Soo wedersta, dat hy moet van my vlijeden.
Ter rechter noch ter slincker doet my wijcken
Maer t'aller tijt mijn stantvasticheyt blijcken,
Dat ick my niet verheffe in voorspoede,
In tegenspoet oock niet en worde moede,
Dan doet voorspoet in my dancbaerheyt bauwen,
En tegenspoet op u een vast betrauwen.
Wt alle dinc op dat my voorcom t'goede,
En ick in my de deuchden heerlick voede,
Dat die soo seer toenemen ende wassen,
Dat geen vyant my meer en can verrassen,
En mijnen lust sy boven alle saken,
V heyligen naem groot en heerlick te maken.
| |
[Folio J5r]
| |
En ghelick in de groote huysghesinnen,
Veel vaten zijn, daer van de sommige binnen,
Ghebruyckelick tot oneerlicke dingen
En d'andren weer eerlicken dienst volbringen,
Doet dat ick bin voor u een vat ter Eeren,
Datmen tot een goet gebruyck mach bekeeren,
Anders niet doe soo lang ick leef op aerde,
Dan dat ic in deuchts toeneeming' volheerde,
Op dat ghy haer van my recht wart gepresen,
Mijn naeste oock van t'quaet tot goet gewesen,
En ic hier nae met vreuchden mach versamen,
Met u mijn Heer, en allen heyligen Amen,
Verwint deur verdraghen,
☞ ☜ |
|