|
| |
5 Hooftstick.
Tsaemspraeck inhovdende Bouckhoudersche questien.
S.V.G. Anghesien men seght Pieter debet, Gimber debet, waerom en seghtmen niet oock ghelt debet, in plaets van casse debet? want datmen de casse anspreeckt om datse t'ghelt in heur te bewaren heeft, men mocht daer op segghen dat ander waren dan ghelt oock wel in cassen geleyt worden, daer af men mette selve reden soude meughen seggen casse debet. St. Datmen seght casse debet in plaets van ghelt debet, ick en sie daer af gheen ander reden dan t'ghebruyck, t'welck soot niet en waer, ick acht datmen beter soude segghen ghelt debet: Want dat ymant mettet woort kelder wilde wijn beteyckenen, en solder
| |
| |
seyde coorn te bedien, om dat hy int een sijn wijn, opt ander sijn coorn leght, ten soude niet lichtelick anghenomen worden, alsoo oock en soude casse voor ghelt, waert in gheen ghebruyck. S.V.G. Nadien de Cassier van t'gelt dat hy ontfangt en uytgeeft sijns Meesters Debiteur en Crediteur is, waerom en steltmen niet den naem des Cassiers debet en credit, in plaets van casse? St. Diet soo dede souder verwarring in d'oirden der bouckhouding deur bevinden, uyt oirsaeck datter dan geen rekening of poste van gelt en soude vallē. S.V.G. Alsmen mette naem des Cassiers soo wel ghelt verstonde als mettet woort casse, soude dat niet al op een selve uytcommen? St. By aldienmen t'ghelt mocht gheven den naem vanden Cassier dieder t'bewint af heeft, daer soude uyt volghen datmen t'peper oock de naem soude meugen gheven vanden Facteur dieder t'bewint of hadde, en soo met ander coopmanschappen, t'welck ongeschict waer. D'oirsaeck waerom sulcx mettet stellen van casse voor ghelt gheen swaricheyt en heeft, is datmen daer, na ghemeene wijse van spreken, t'begrijpende voor t'begrepen neemt. Oock waert een duyster saeck, dat eenige menschens namen ghelt souden beteyckenen, eenighe niet. S.V.G, Ghy segt dat wanneer des Cassiers naem ghestelt wierde, soo en souder inde bouckhouding geen rekening van ghelt vallen: Maer hier tegen mochtmen weerom antwoorden, dat alsmen de Cassens naem stelt, soo en valter dan inde bouckhouding gheen rekening van Cassier, nochtans ist hoochnoodich gheweten hoemen daer me staet. St. Tis soo, want een van beyden ghestelt sijnde, d'ander blijfter uyt, en wort daer af besonder memorie ghehouden. S.V.G. Het schijnt nochtans een vreemde sake dat vanden Cassier die sijn Meester schuldich is gheen rekening te boucke en wil vallen, soudemen met een woort niet connen segghen waer dat an schort? St. Ick meyn datment aldus soude meughen verclaren: Een Cassier van sijn Meesters
weghe ontfanghen hebbende duysent guldens, dat de Meester hier uyt aldus beslote: Die duysent guldens behooren my toe ick hebse in mijn casse: Boven dien mijn Cassier is my schuldich duysent guldens, want hy van mijnent weghe soo veel ontfanghen heeft: En volghende sulck ghestelde maccte in sijn boucken casse debet van duysent guldens, en den Cassier oock debet van soo veel, dat waer openbaerlick ghemist, en het capitael van duysent guldens grooter ghestelt dant dadelick wesen soude. Hier uyt machmen verstaen dat casse debet ghestelt sijnde, waerom den Cassier boven dien gheen debet en mach ghemaeckt worden, niet tegenstaende hy sonder opsicht te nemen tottet eerstghestelde, debiteur soude wesen. Noch is t'anmercken dat eenighe soorte van Cassiers te boucke connen commen, maer in wat ander ansien, t'welck dusdanich is: Wanneer eenighe Ondercassiers hebben eenen Generalen, daer sy altemael hun ghelt an leveren (gelijckt in Domeine en extraordinaire Finance toegaet) t'welck den Meester niet eer en acht in casse te wesen voor dattet den Generalen Cassier en heeft, alsdan meughen die Ondercassiers van hun ontfangh en betaling te boucke debet en credit ghestelt worden, doch en comter dan den naem des Generalen Cassiers niet, maer in sijn plaets casse: Sulcx dattet eintlick noch al opt eerste segghen uyt comt, te weten dat den ghenen die eygentlick Cassier is, niet te boucke en staet. S.V.G. Soo den Coopman an ymant een groot geschenck dede, als neem ick met sijn dochter ettelicke duysent guldens ten huwelicke gaef, hoe soudemen die int Iornael stellen? St. Capitael debet per casse. S.V.G. En of hy aen een kint een stuver gaef om noten te coopen, waer soude dat behooren te commen? St. Op oncosten vanden huyse, segghende Oncosten vanden huyse debet per casse. S.V.G. Anghesien t'een en t'ander gheschenck is, alleen verschillende in me- | |
| |
nichte, wat sekerheyt isser van een middelbaer somme hoe die commen moet?
St. T'ghene ick gheantwoort heb is alsoo metten lichtsten gheseyt na de ghemeene wijse van doen, maer de meining van u Vorstelicke Genade tot sulcken einde streckende als ick nu mercke, soo souder breeder onderscheyt en verclaring by behouven. Tis te weten dat na dien alle oncosten het capitael verminderen, oock meughen capitael ghenoemt sijn, te weten capitael debet, en souden int Schultbouck inde poste van capitael debet by d'ander partien meughen ghestelt worden, maer want een Coopman wil weten wat hy jaerlicx in sijn huyshouding verteert, soo maeckt hy van t'verminderende capitael dat totte huyshouding behoort een besonder rekening, brengende de somme van dien eens t'siaers als hy staet maeckt, of als hy sijn bouck sluyt, onder capitael debet. Dit soo sijnde, t'is kennelick dat een Coopman, die als gheseyt is een groote somme van ettelicke duysent guldens met sijn dochter ten huwelick gheeft, t'selve gemeenelick niet en hout voor oncosten vanden huyse, maer voor een partie diens ghelijcke selden comt, en als verminderende capitael, dat onder capitael debet by d'ander partien ghestelt mach worden: Sgelijcx is kennelick datmen een gheschoncken stuver ghemeenelick voor oncosten vanden huyse rekent, om dat sulcx inde huyshouding dickwils te vooren comt. Doch soo ymant van ander ghevoelen waer, en verstonde de boveschreven ettelicke duysent guldens onder de oncosten van sijn huyshouding te behooren, hy soude die soo meughen te boucke stellen, ende en soude om de voorgaende redenen (te weten dat t'een en t'ander capitael bediet, en eintlick daer onder comt) inde sake gheen verschil by brenghen: Sulcx dat de ghemeene reghel der bouchouding hier in niet onsekers en heeft, ghelijck u Vorstelicke Genade voorwende, want den Coopman besloten hebbende van wat ghedaente hy sijn uytghegheven penninghen neemt te wesen, soo en valter maer een bekende stelling. Om hier af noch breeder te spreken, t'gebeurt dat ymant coopt
een Diamant, of stuck schilderie, en t'selve ansiet voor huysraet, en dat daerom neemt voor oncosten vanden huyse, of voor verminderende capitael: Maer een ander coopt sulcx om weerom te vercoopen, en prouffijt daer an te doen, waer deur hy t'selve te boucke stelt als ander gecochte waren, dat sijn debet en credit ghevende. Noch is te weten dat sulcke manier van twijffeling niet alleen en valt in capitael, maer in meer ander partien: Als by voorbeelt, soo Pieter an my schuldich waer, en ick an Ian, den welcken ick bewesen heb van Pieter t'ontfanghen, Ick stel aldus: Ian debet per Pieter. Maer soo ick wilde nemen dat Pieter my t'ghelt ghetelt heeft, en ick t'selve gelt weerom an Ian, deur dien ick mijn boucken wil doen overcommen met die van Ian en Pieter, welcke ick mercke hun met gheen assignatie te willen becommeren, oft om soodanighe oirsaeck dan alst wesen mocht, in sulckē gevalle sal ick volgende sodanich gestelde twee partien maken, d'eerste aldus: Casse debet per Pieter, de tweede: Ian debet per casse, en sal al op een selve uytcommen. Wederom, soo ick met ymant mangheling ghedaen heb, en hem ghelevert peper voor gimber, ick stel aldus: Gimber debet per peper: Maer soomen wilde nemen dat ick van hem sijn gimber ghecocht heb met ghereet ghelt, en hy van my het peper oock ghereet ghelt, elck tot sulckē prijs als inde mangeling verdragen wiert, men soude volgende sulck ghestelde twee partien maken, d'eerste Gimber debet per casse, de tweede Caβe debet per peper, en alles soude op een selve uytcommen: Inder vougen dat met elcke stelling het voornemen ghevolght, soo gaet de bouckhoudersche reghel in alle dese oock vast. S.V.G. Ghy hebt gheseyt dat oncosten capitael beteyckenen, maer ten schijnt gheen goet onderscheyt, ghemerckt des Coopmans
| |
| |
ghelt, waren, Debiteurs, en Crediteurs, oock al capitael bedien, want als blijckt int begin des Iornaels, soo bestadet capitael uyt soodanighe partien. St. Wy hebben hier vooren gheseyt van vermeerderende of verminderende capitael, sulck sijn ontfanghen giften, winning, verlies, en dierghelijcke. S.V.G. Maer ghelt, goet, en Debiteurs vermeerderen oock het capitael, want hoe hy sulcke meer crijcht, hoe sijn capitael grooter wort, en deur Crediteurs cleender. St. Ic heb daer af ander ghevoelen: Om t'welck by voorbeelt te verclaren, soo ick van Pieter coop een bale peper op dach, t'selve peper en vermeerdert mijn capitael niet, want ick an Pieter soo veel schuldich worde alst peper weert is: Sghelijcx en vermindert mijn capitael niet deur dat Pieter mijn Crediteur wort, wanttet soo veel mettet peper vermeerdert: Maer my een bael peper geschoncken sijnde, soo stel ick Peper debet per capitael, en daer me vermeerderet. S.V.G. Ick moet nu een ander vragen: De posten staen int Schulibouck met debet en credit, welck van beyden streckt tot mijn voordeel, welck tot mijn achterdeel? St. Debet tot voordeel, want Pieter my veel schuldich wesende, dat vermeerdert mijn capitael, alsoo oock doet veel peper int packhuys, veel ghelt in casse, die al onder debet staen, maer credit doet het verkeerde. S.V.G. Isser gheen uytneming? St. Ick en bedencke gheen. S.V.G. Nochtans capitael debet en schijnt tot mijn voordeel niet te strecken, noch capitael credit tot mijn achterdeel, maer heel verkeert. St. Daer op en docht ick niet, u Vortelicke Genade heeft ghelijck, want die uytneming valt in capitael, en in gheen ander, so ick meyne. S.V.G. Nochtans Oncosten debet en Rekening van winst en verlies debet strecken oock beyde tot achterdeel. St. Anghesien die capitael sijn om de redenen terstont
gheseyt, soo en valter gheen uytneming dan in capitael. S.V.G. Den credit der poste van naghelen bedraecht in het Schultbouck 75 ℒ 4 β 7 ₰ meer dan den bebet, welcke nochtans voordeel sijn, want het is prouffijt ghevallen op naghelen. St. Men mocht daer op antwoorden dat wanneer die poste ghesloten waer (t'welck vry staet te doen alsmen wil, hoewel men gemeenelick tot opt einde des jaers toeft) en datmen sulck prouffijt van 75 ℒ 4 β 7 ₰ by slote onder debet stelde, ende in rekening van winst en verlies onder credit, inder voughen dat de poste van naghelen alsoo heur volcommentheyt hadde, soo soude dan den debet even sijn metten credit, en die voorschreven questie van voordeel inden credit niet vallen. S.V.G. Maer evewl blijvet vast, datmen vande poste van naghelen, en alle ander daer winst en verlies op valt, niet soo volcommelick en mach segghen ghelijck van ander posten, den debet tot voordeel en credit tot nadeel te strecken. St. Tis soo, ende heeft daer in wat uytneming: Doch t'schijnt vast te gaen in alle poste van capitael of capitael beteyckenende, dat debet nadeel, en credit voordeel is. S.V.G. Waerom heeft dese poste van capitael meer uytneming als al d'ander partien? St. uyt oorsaeck dat capitael debet, soo veel beteyckent als of de Meester seyde, Ick N ben debet: Maer hoe een man self meer debiteur is, hoet meer tot sijn achterdeel streckt, en hoe meer crediteur hoe meer t'sijnen voordeele, waer deur sulcx t'verkeerde vant ander moet wesen. S.V.G. Te wijle capitael of des Meesters naem een selve beteyckent, waerom en steltmen in plaets van capitael niet des Meesters naem? want daer me en souden sulcke dinghen soo duyster niet vallen. St. Cooplien sijn dickwils in compaignie van velen, die alt'samen een hoofisomme
hebben, en daerom behoufter van dies een ghemeene naem, waer toe t'woort Capitael met geen onteden gebruyct en schijnt. Ten anderen nadien een mans rijckdom of goet dat hy in een voorghestelden handel heeft, een punt is van grooten ansien, soo vereysschet in alle bouckhou- | |
| |
ding een gemeene bekende uytstekende naem, t'welck die des Meesters onder veel ander namen van menschen te boucke staende, niet bequamelick sijn en soude, maer wel t'woort capitael. S.V.G. Ghy hebt eens gheseyt als voor gemeene reghel, dat de Meester sijn selven nummermeer debet noch credit en stelt, nochtans na dien capitael en des Meesters naem een selve beteyckent, daer volght uyt dat soo dickwils hy capitael debet of credit maeckt, dat hy soo menichmael sijn selven stelt. St. Ick seyde daer noch by In alle ghehandelde partie, op welcke woorden te letten staer, want de Meester in alle gehandelde partie sijn selven debet noch credit en stelt, daer hijt doet ten sijn gheen partien in welcke hy met ymant handelt: Als wanneer hy van weghen peper hem gheschonckē, seght Peper debet per capitael, daer en is niemant daer hy me handelt. S.V.G. Vallender int bouckhouden gheen ander verscheydenheden dander in dese boucken ghestelt en sijn? St. De Bouckhouders hebben noch verscheyden ghevoelen angaende de bequaemste oirden van rekening in Facturie, en Compaignie, maer want mijn ghevoelen is de selve int voorgaende Iornael en Schultbouck niet behooren ghemengt te worden, soo heb ick daer af wat int besonder gheschreven.
TSAEMSPRAECX EINDE. |
|
Auteursrechtvrij