Nv van Ivpiters breede.
Ptolemeus heeft deur dadelicke gagheslaghen ervaringhen de gedaenten van Iupiters breedeloop alsins bevonden gelijck van Saturnus int voorgaende geseyt is, welcke int besonder dusdanich sijn:
Ten eersten soo was sijn meeste breede op de Noortsijde van 2 tr. 4 ①, ghebeurende altijt als sijn inronts middelpunt schijnbaerlick was 20 tr. voor sijn wechs verstepunt, te weten onder des duysteraers 141 tr. en Iupiter an des inronts naestepunt, maer buyten het naestepunt wesende, soo was sijn Noordersche breede voor datmael cleender, en ten minsten doen hy alsoo an het verstepunt was.
Ten tweeden soo bevant hy op de Zuytsijde de meeste breede van 2 tr. 8 ①, ghebeurende altijt als sijn inronts middelpunt was onder het teghenoverpunt des boveschrevē 141 tr. dats onder des duysteraers 321 tr. en Iupiter an sijn inronts naestepunt: Maer buyten het naestepunt wesende, soo was sijn Zuydersche breede voor datmael cleender, en ten minsten doenmen hem an het verstepunt vandt.
Ten derdē wesende het inronts middelpunt in een der duysteraersnees twee uyterstē, so bevant hy Iupiter, gelijck oock van Saturnus geseyt is, altijt int plat des duysteraers sonder breede, tot wat plaets des inronts hy oock wesen mocht.
De spiegeling by Ptolemeus hier op met stelling eens vasten Eertcloots veroirdent, is van ghedaente teenemael gheweest als die van Saturnus, sulcx dattet on noodich schijnt de selve hier te verhalen: Ende want de spiegeling met stelling eens roerenden Eertcloots ande voorgaende van Saturnus oock ghelijck is, en daer deur verstaen wort, soo en beschrijf ick die niet int langhe.
Auteursrechtvrij