punticheytlijn, en mette halfmiddellijn B C sy op B als middelpunt beschreven de Sonwech C D E, waer in C A voortgetrocken tot E, soo is E t'naestepunt, C t'verstepunt, daer na sy tusschē den vasten Eertcloot A en B gestelt het punt F als Maenwechs middelpunt, en daer op mette halfmiddellijn F G beschreven den Maenwech G H, sniende A E in H als naestepunt, en A C in G als verstepunt, an t'welck ick voor begin neem de Maen te wesen. Op een tijt lanck daer na sy de Maenwechs middelpunt gecommen van F tot I, waer op ick mette halfmiddellijn I K, even an F G, beschrijf de Maenwech K L, diens verstepunt K, sulcx dat op den boveschreven tijt des Maenwechs verstepunt gecommen is van G tot K, en daerentusschen is de Maen van het verstepunt ghecommen soo verre als van K tot M (met soo veel heele ronden daer toe alst wesen mocht, diemen hier om bekende redenen verlaet) daer na ghetrocken A M, soo sal de Maen uyt A gesien schijnbaerlick soo verre sijn van C, wesende onder des duysteraers 65 tr. 30 ①, als den houck C A M mebrengt.
Dese teyckening des Maenwechs met stelling eens vasten Eertcloots aldus ghedaen sijnde, wy sullen totte teyckening van de ander stelling commen. Tot desen einde stel ick in C A t'punt N, alsoo dat de uytmiddelpunticheytlijn C N even sy an A B, en beschrijf op N als middelpunt mette halfmiddellijn N A die even moet sijn mette halfmiddellijn B C het rondt A O P als Eertclootwech, diens naestepunt P, verstepunt A, waer in ick neem den Eertcloot A mette Maenwech daer rontom ghecommen te sijn tot O, gheloopen hebbende den booch A O, of houck A N O. By aldien nu des Maenwechs verstepunt gheen eyghen roersel ghehadt en hadde te wijle den Eertcloot ghecommen is van A tot O, maer altijt ghebleven hadden tusschen den Eertcloot en t'punt N, t'is kennelick dattet soude wesen inde lini O N an t'punt Q, soo verre van O als van A tot G: Maer het heeft deur het 11 voorstel deses 3 boucx een roersel teghen t'vervolgh der trappen even an den Eertclootloop A N O, soo veel min als sijn schijnbaer voordering inden duysteraer bedraecht, dats den houck G A K, daerom treck ick de lini O R even en evewijdeghe met A G, en soude des Maenwechs verstepunt moeten sijn an R, gheloopen hebbende teghen t'vervolgh der trappen den houck Q O R, waerder niet noch af te trecken een houck even ande schijnbaer voordering G A K, daerom treck ick de lini O S even an A G, en alsoo dat den houck R O S even sy metten houck G F K, teycken daer in t'punt T, soo dat O T even sy met A F, en beschrijf op T als middelpunt, mette halfmiddellijn T S, den Maenwech S V R, diens verstepunt S: Maer want op den boveschreven ghestelden tijt de Maen met stelling eens vasten Eertcloots, ghecommen is van t'verstepunt K tot M, soo stel ick inde Maenwech S V R t'punt V, soo dat de booch S V of houck S T V, even is metten houck K I M, en stel de Maen te wesen an t'pnnt V. Dit soo sijnde, ick segh de Maen V uyt den roerenden Eertcloot O, ghesien te worden onder de selve schijnbaer duysteraerlangde daer de
Maen an M onder ghesien wort uyt den vasten Eertcloot A, en dat de verheyt O V even is mette verheyt A M, om dese reden. T'bewys. Anghesien O R evewijdeghe is met A G, en den houck R O S even metten houck G A K, soo moet O S evewijdeghe sijn met A K. Voort anghesien den houck S T V, even is metten houck K I M, soo is de lini T V evewijdeghe met I M, boven dien soo heeft den driehouck T O V twee sijden T O, T V, even en evewijdeghe met des driehoucx I A M twee sijden I A, A M, waer deur haer derde sijden O V, A M oock even en evewijdeghe sijn, en daerom wort de Maen an V uyt den roerenden Eertcloot O, ghesien onder de selve schijnbaer duyste-
Auteursrechtvrij
