Diversche refereynen ende liedekens, uut Hollant, ende Zeelant

(1582)–Pieter Sterlincx– rechtenstatus



[Folio E6v]
Een nieu Lideken op de wijse Goe goet is Godt van Israel. O Nederlandt seer soet Hoe placht ghy te floreren In weelden en voorspoet Soo sachmen v heerlijck domineren Ghy hadt van als planteyt V en mocht niet ghebreken V beesten ver’gheweyt Daer wistmen af te spreken Van als was v bereyt Door Godt almachtich soot ons is ghebleken. Vrede was doen int landt Orloch die lach gheuanghen Solaes aen elcken cant Daer toe een ieghelijck hadt groot verlanghen Men sach die Rethorijck In dese Lande bloeyen Oock mede de musijck Seer constelijcken vloeyen Daer was noyt haers ghelijck Van Conste alsmen doen wel mocht bevroeyen. Maer desen soeten tijt Die is nv heel verloren Daer is nu haet en nijt Het volck gaet haer op elck ander verstooren Die liefde is heel doot Eendracht wort nu verschouen Aldus coemt ons den stoot, Dat hem elck mach bedroeuen Daer isser veel in noot Men siet te hans het kint den vader beroouen.
[Folio E7r]
O Prince, eeuwighen Godt Wanneer sak u erbarmen, Dat ghy dit quaede Lot Van ons sult nemen door u goet ontfermen, Wy hebben langh verbeyt Met grooter treuren clachtich, Aensiet doch die ioncheyt Door v ghenade crachtich Sent ons met goet bescheyt Den Peys door v Goddelijck woort warachtich. Aensiet die Ionckheyt. Schiedam.