Diversche refereynen ende liedekens, uut Hollant, ende Zeelant

(1582)–Pieter Sterlincx– rechtenstatus


Lideken op de Voys Al waer ick half doot. O Hollant onversaecht Ghy leeft nu wel in vreden, Nu dat ghy hebt veriaecht Die u wouden vertreden, Met haer tirannich-heden Waren vermoet // te storten bloet Maer Godt die heeft v daer gans voor behoet. Ghy worden oock gheschat En moesten thienden penninck gheuen, Eer dat ghy orloch hadt Daer Duckdalf af moest leuen, En die zijn nu verdreuen Dat Spaens ghewelt // die om het ghelt V al dees langhe tijt hebben ghequelt.
[Folio E5r]
Die ongherechticheyt Die is nu wt de landen, En al v majesteyt Die coemt v weer ter handen V ghelt v goet v panden Dat op dat pas // vermindert was Dat sal v van Godt weer toe vloeyen ras. Al die afgodery Hebt ghy nu wech ghecreghen, Nu mach elck leuen vry En wandelen in Godts weghen Dat wel eer moest zijn versweghen En bleef versmoort // dat comt nu voort Het welck is die waerheyt onghestoort. O Princelijcke macht Die ons heeft gaen bewaren, En benomen haer cracht Die ons ghinghen beswaren, Lof, O Heer der Heerscharen Die ons in vreen // hout al ghemeen Dorpen, Sloten ende daer toe Steen. Hope troost my, Rotterdam.