Diversche refereynen ende liedekens, uut Hollant, ende Zeelant(1582)–Pieter Sterlincx– Auteursrechtvrijvan verscheyden beminders der Consten ghelesen, ende gesonghen, inde Heerlijcheyt van Heenvliet, Ten versoecke van Peeter Sterlinx, den derden September 1580 Vorige Volgende [Folio D7r] [fol. D7r] Refereyn Christelijcke broeders religieuse sinnen Wilt niet laten, soect den verloren te winnen Verdraecht malcand’, schout opgeblasen verstant En denct hoe Christus met ons lijt wt minnen Wilt met dienstbaerheyt alle dinck beghinnen Weet dat Appollo beghiet, en Paulus die plant Dus die op Christum voortbrengt vruchten abondant Wil den Vader behouwen, maer sasl afsnoeyen Wel tot zijnder tijt die boose rancken, want Tot den tijt des Oogsts, sal tcaf werden verbrant Soo lang ghebiet Godt, salment laten groeyen Dus ist quaet in Gods Oordeel hem te bemoeyen, Laet Gods dienaren, ten Oogst vergaren die scheluen Denct wie staet mach vallen, dus wilt niemant verfoeyen Lijdt deen des anders fouten, soo kent ghy v seluen. Kent u seluen al sondaren te wesen Laet schijn van deuchden gheensins werden ghepresen Door Religieus ghebruyck, op Pharisenschen aert Denct hoe Godt den Publicaen hadde wtghelesen Die reyn wt den tempel ghinck, en verstaet by desen Hoe den oordeelder dicmael hem seluen beswaert, Dus als Christenen broederlijck by een vergaert Elck ander verdraecht, en v seluen verheft doch niet Lijdtsaemheyt onder een in liefden baert Ouer niemant om tgheloof het oordeel verclaert Het is Gods gaue, die de herten doorsiet En wt ghenade, ons hier goet van Godt geschiet Die zijn volck met zijnen gheest wil ouerweluen Dus broeders toch alsoo ons Christus ghebiet Lijdt deen des ander fouten, soo kent ghy v seluen, [Folio D7v] [fol. D7v] Wilt malcander toch al vriendelijck lijden Al sydy van Christo daer gheroepen bijden Eersten Apostolische ghemeynte goet, En siet ander iemant vanden duuel bevrijden Niet van v complicien, sult daer in verblijden Als Christus Ioannem gheboot, toch mede doet, Wat niet tegen Godt is, is met hem dus handelt vroet Denct hy seyt ick heb noch al ander schapen Thangt aen Heyden, noch Ioden, maer aent Godlic gemoet, Dus beueelt hem dien last, die goet en quaet hier voet Laet hem v in gheen valsch oordeel betrapen Wilt honich wt de bloem, en geen fenijn toch rapen Om den verborghen schat, wilt in v acker deluen Denct wat ghy noch zijt, en hoet u voor slapen Lijt deen des anders fouten, soo kent ghy v seluen. Prince. Den Prince Christus can al ons fouten draghen En heeft ons sondaren naer zijn behaghen Alsoo malcanderen hier te lijden belast, Oft sal den onnutten knecht een ander beclaghen Diens schult vergheuen wert, zijn broeder met flagen Af eysschen, hy siet dat hem zijn heer niet en verrast Want Godt coemt alsmer dicmael alderminst op past Dus al gheschiet ons quaet, wy moeten vergheuen Daerom broeders int oordeelen v niet en vertast, En acht v seluen oock niet al te weerden gast Hy sal werden vernedert die hem heeft verheuen, Dus laet alle goede herten v gaen beneuen Inden wijngaert ghestuert ten achten en ten eluen Soot den wijngaredenier behaecht wilt toch leuen Lijdt deen des anders fouten, soo kent ghy v seluen. Aensiet liefde. Vlaerdingen. Vorige Volgende
Auteursrechtvrij