Diversche refereynen ende liedekens, uut Hollant, ende Zeelant(1582)–Pieter Sterlincx– Auteursrechtvrijvan verscheyden beminders der Consten ghelesen, ende gesonghen, inde Heerlijcheyt van Heenvliet, Ten versoecke van Peeter Sterlinx, den derden September 1580 Vorige Volgende [Folio D8r] [fol. D8r] Refereyn O curieuse werelt hoe sydy verblint Met veel opinien, die in v floreren Dies zy malcanderen soo hebben ghesint Soo dat zy niet en doen dan condemneren, Deen om de Vermony’, dander om t’sacrificeren Deen oordeelt de splinter, den Balck missende, Dander swelcht den kemele, door s’vyants tempteren Deen oordeelt tgeuoelen van een ander gissende Dander wil zijn schanden zijn wtwissende Door eens anders fouten vol malitie, Elck is zijns naesten hert en moet hissende Teghen malcanderen om een cleyn vicie Dwelck voorwaer is gheen Religions exercitie, Maer wilt ghy, dat u sulcx niet can ouerweluen Lijdt deen des anders fouten, soo kent ghy v seluen. Hoe moghen de menschen dus Curieus // wesen Dat zy haer oordeel bouen Godt stellen, Sal altijt het verdoemen de leus // wesen Soo sullen zy ons selfs ter neder vellen Want met wat maete zy wtmeten en rellen Met de selue sal Godt weder in meten, Dus naeyt v seluen niet meer aen, tuyten met bellen V rechueerdigende met een Phariseens weten, Want Godt die daer hooghe is gheseten Heeft sulcx altijt verboden warachtich, Ia noyt met exempelen bewesen deurbeten Maer wel het wederspelt hier van seer crachtich Daerom wilt de liefde niet verdrijuen eendrachtich Dan wilt ghy toonen gheen liefde te bedeluen Lijdt deen des ander fouten, soo kent ghy v seluen. [Folio D8v] [fol. D8v] Dat Godt ons lijt ende niet haest en verdoemt, Can d’oude ende nieuwe testament bethoonen Siet waerop Dauidt anders heeft gheroemt, Oock den vromen Manasses, sonder verschoonen Magdalena, heeft hy oock niet willen hoonen Maer met Petrus, ghenade bewesen Zacheus wilde hy met barmherticheyt croonen, Met noch veel meer andere soo wy lesen, Volcht dan naer zijn rechte voetpaden ghepresen, En laet curieuse sophisterije varen Want van smenschen oordeel, can hy ons ghenesen. En ghy brenght daer door u selfs int beswaren Dus wilt ghy bewijsen te wesen Godts dienaren, Met liefde ghetast als hooghe scheluen, Lijt deen des anders fouten, soo kent ghy v seluen. Prince. Ghy Princen wilt oock altesamen ghedencken Hoe onnoosel dat Christus zijn leuen liet, Wie die waren die hem ghinghen crencken, En wie dat hy was die hem verriet, Daer en bouen, hoe alle zijn Apostelen siet Hem begauen, daer zy op verscheijden tijden Van hem soo menich sermoon hadden gehoort mz vliet En soo veel mirakelen ghesien, t’onsen verblijden Maer seght wat sprack hy toch sonder mijden, (Verresen zijnde) tot zijn lieue Clercken Seyde hy niet mijn Broeders vrede moet v beurijden Sonder te verwijten haer veltvluchtighe wercken Die zy nochtans in verscheyden percken Wel hadden gesien onder haer eluen Lijt de een des anders fouten, soo kent ghy v seluen. Corrigez sans reproche. Briele. Vorige Volgende
Auteursrechtvrij