Diversche refereynen ende liedekens, uut Hollant, ende Zeelant(1582)–Pieter Sterlincx– Auteursrechtvrijvan verscheyden beminders der Consten ghelesen, ende gesonghen, inde Heerlijcheyt van Heenvliet, Ten versoecke van Peeter Sterlinx, den derden September 1580 Vorige Volgende [Folio D6r] [fol. D6r] Refereyn Laetstmael quam my voor alsoo vremde gedachten Al op een plaetse daer ick doen vernachten My docht daer regeerden een so wijsen heer vaillant Tvolc quam by hem geloopen met grooter machten Van alle natie en elck de zijn clachten Hoe datse waren bedoruen in Nederlant Elck socht aen hem troost en door zijn goet verstant Hy haer terstont vraechde, wel wat is v begheren Spreect vrijmoedich, laet my hooren als v te hant Doen waren daer som, die wilde hem informeren Des anders ghebreken, en wildent doceren, Dat dese dwalen, al warense met haer eluen Die de Catholijcke religie resisteren Maer den wijsen antwoorden met goede leren Lijt deen des anders fouten, soo kent ghy v seluen. Doen bestonden daer andere te claeghen swaerlijck Alsoo my dochte, aen desen heere claerlijck En zeyde tis altemael die schult der papen Dat wy dus gheplaecht worden openbaerlijck Met moorden, branden, roouen veruaerlijck Dus moghen wy wel claghen helaes och wapen Want zy zijn vol ghebreken met granten en rapen En die Godts woort volghen, daer op zijnse verwoet Ghelijck hongherighe woluen nae die schapen En dat om te versinnen donnosel bloet Dus bidden wy v heere, met grooter ootmoet Dat ghy haer vernielt als stinckende hoy-scheluen Hy antwoorde soo my dochte, met reden vroet Soude ick sulcx doen, dat en waer niet goet Lijt deen des anders fouten, soo kent ghy v seluen. [Folio C6v] [fol. C6v] Die Catholijcken bestonden weder te claghen Sy en wouden niet doen naer des Paus behagen Soo ghinghen zy roepen al seer yselijck Dus deden wy na ruyters en knechten vraghen Om sulcke rebellen wt ons Lant te iaghen Want haer fouten waren seer afgrijselijck Sy verleyden den simpelen dit is misprijselijck Wy hopen ghy sult dit niet langher lijden Hy antwoorden haer wederom seer wijselijck Daer en hoortmen met ghewelt niet teghen te strijden Dat oordeel coemt Godt toe, wilt ghy sulcx mijden Want het quaet cruyt gaet uwen thuyn ouerweluen Dus radick v voor tbeste wilt dat eerst wt wijden Al eer ghy den anderen wilt benijden Lijdt deen den anders fouten, soo kent ghy v seluen. Prince. Doende den wijsen Prince dees klachte hadde verstaen My docht int antwoorden was hy wel beraen Hy seyde, waerom wilt ghy dit malcander wijten Want v eyghen sonden, die hebbent ghedaen Dat ghy ghestraft wort hoort mijn vermaen Waerom gaet ghy dan dus roepen en crijten Ia verwoet als beeren die malcander bijten Want elck siet dat caf in des anders ooghen En den balck wilt ghy wt v selfs niet slijten Hier door vint ghy v seluen bedroghen Godts woort is waerachtich, ten heeft noyt geloghen Dus bid ick v vriendelijck wilt doch bedeluen V eyghen sonden, soo salt Godt wel genoghen En doet als ick v raede, nae v beste vermoghen Lijt deen des anders fouten, soo kent ghy v seluen. Aensiet die Ionckheyt. Schiedam. Vorige Volgende
Auteursrechtvrij