Diversche refereynen ende liedekens, uut Hollant, ende Zeelant(1582)–Pieter Sterlincx– Auteursrechtvrijvan verscheyden beminders der Consten ghelesen, ende gesonghen, inde Heerlijcheyt van Heenvliet, Ten versoecke van Peeter Sterlinx, den derden September 1580 Vorige Volgende [Folio D5r] [fol. D5r] Refereyn Broeders t’ghebet dat Christus ons heeft geleert Nemt ter herten en merct wat hy daer in betoont Dat wy al sondaers zijn dus v sinnen keert In liefde op elckandere, op dat Godt v verschoont Spreect als Dauid, Heere niet naer mijn daden en loont Maer naer v bermherticheyt wilt met my leuen Tis quaet dat iemant op hem seluen stoont Oft dat opini wert ter salicheyt ghedreuen Denct den Phariseus die hem seluen verheuen Heeft, voor Godt inden tempel, hoe hy is gheuaren Die Ioden, en zijn alleen tvolck ghebleuen Dat soud’ v Ieremias brief wel openbaren Weet dat die Magi van Oosten gheen Ioden waren Godt can diuers volck met zijn gheest ouerweluen Lijt deen des anderes fouten, soo kent ghy v seluen. Wel te recht mach Paulus ons Heydenen raken Seght dat wy opden boom der Ioden zijn gheplant Maer Godt can ons af snijden wilt dit wel smaken Andere op planten door zijn moghende hant Verwijt het glorieus roemen op religie want Godt spreeckt wie hem verheft die sal moeten dalen Eenen vromen voorganck, is voor Godt vaillant, Dan tis wt gheen roem van alsulcx te halen Leeft recht van Naman soo suldy niet dwalen Die van Heliseo was heerlijck ghenesen Laet die wijngaerdenier die last om te betalen Wt genade moecht ghy toch maer een dienaer wesen Wat roert v wien hy hier heeft wtghelesen En beroepen ten achten oft ten eluen Lijt deen des anders fouten soo kent ghy v seluen. [Folio D5v] [fol. D5v] Weet dat niemant hier en is volcomen Dan Christus en die heeft veel Diuersche schapen Hy draecht haer lasten dus wildy v romen Sijn name, soo en wilt v hier in niet verslapen Argert den minsten niet die Christum voor zijn wapen Hier heeft, merckt op die Coninghinne van westen Wat een blom suldy hoenich en gheen fenijn rapen Siedy iemant falen schickt dat ten besten Want om schult betalen, sou aen ieghelijck resten Dus wilt Godt den Vader toch den oost beuelen Hy is den eersten, en blijft oock den lesten Niemants misdaet sal hy int oordeel helen Aent oncruyts vernielen salt hem niet schelen Laet zijn dienaren dan vergaren die scheluen Lijt deen des anders fouten, soo kent ghy v seluen Prince. Den Prince sprack recht wie daer is sonder sonden Tot den Schriftgeleerden hy werp den eersten steen Maer waer is oyt mensch alsulcx beuonden Die sonder Godts ghenaden mochte wesen reen Tis ghenade om ghenade al voor groot en cleen Dan tbuert dagelijcx noch dat den onnutten knecht Willende als opper dienaer regieren alleen Met zijn broeder gheweldelijck wil int recht Die nochtans zijn schult bekent eenvoudich en slecht Och broeders niet alsoo vergheeft elck anders schult Weest broederlijck int ghemoet aen een ghehecht Lijt elckander op dat ghy Godts wille veruult Elck struyckelt haest dus elckander ghy lijden sult Hoe wel ghy naer den verborghen schat wilt deluen Lijt deen des anders fouten, soo kent ghy v seluen. Aensiet die Ionckheyt. Schiedam. Vorige Volgende
Auteursrechtvrij