Diversche refereynen ende liedekens, uut Hollant, ende Zeelant(1582)–Pieter Sterlincx– Auteursrechtvrijvan verscheyden beminders der Consten ghelesen, ende gesonghen, inde Heerlijcheyt van Heenvliet, Ten versoecke van Peeter Sterlinx, den derden September 1580 Vorige Volgende [Folio B7r] [fol. B7r] Hier beghinnen de Refereyen Int Amoureus. Met minnen versaemt. Refereyn. Ghy aerdighe Gheesten, vol amoureusheyt Coempt haestelijck voort, als Venus scholieren Waer zijdy: Phebus // vol coragieusheyt Die d’eerste vrijaetgie maecte, suet van manieren Met Daphaene v liefste, als Venus dieren Seght my Waer wt de liefde haren oorspronck heeft? Hipolite en Phedra coempt oock, sonder vieren Ghy Paris die Aenone daer na begheeft Waer zijdy Aeneas daer Dido om sneeft Iason die Hipsiphille zijn lijf salueerde Penelope die om Vlisses haer web ontweeft Dees al haer inden oorspronck, der liefden gheneerde Als elck wel weet, die van haer oyt studeerde Dat den oorspronck der liefden, coemt met corage Wt het aenschouwen, van een schoon personage. Als Paris, Venus, Iuno en Pallas aenschoude Vercoos hy amoreusheyt, voor rijcdom en verstant Na dien hem belooft was, dat hy hebben soude Helenam, die alderschoonste, van t’gheheele lant Want doort aenschouwen van haer dryen, lach zijn hert in brant Door Iasons visagie wert Medea ontsteken Hoe wel hy haer namaels noch leet in schant, Leander heeft Hero zijn lief niet besweken Acontius bedrooch Cidippe loos van treken Als hy haer schoonheut aenschoude, sijn hert moest blaken Doort gesicht quam den oorspronc der liefden, gestreken Als den Godt Pluto Proserpina ghinck ontschaken Dees alle doort aenschouwen inder liefden, ontstaken Dus coempt den oorspronck der liefdem, door elcx vijage Wt het aenschouwen, van een schoon personage. [Folio B7v] [fol. B7v] Als Mercurius en Phebus, Chione saghen Verliefden sy haer, ende hebbense bedrooghen Hippornes hadde in Atalantha behaghen Door daenschouwen van haer schoon claer bruyn oogen Die welgheleerde Sappho die werde ghetooghen Door tghesichte, tot liefden op Phasn seer schoon, Narcissus en mochte hem niet ghenooghen Te aenschouwen die schaduwe van sijn selfs persoon Dien hy int water sach, hem spieghelende ydoon Dies hy daer verliefde, op hem seluen sottelijck Canace die spande van schoonheyt die croon Dies Machareus haer beminde ongottelijck Want twas haren broeder dus wast bespottelijck Dus heeft die liefde haer oorspronck by elcx image Wt het aenschouwen van een schoon personage. Prince. Ghy Princelijcke minnaers, amoureus van gheest Die inde vryage, hebt een goet behaghen Den oorspronck der liefden, soect aldermeest Oft anders en condy gaer niet beiaghen Doorts moet ghy v seluen, oock eerlijck draghen Als ghy door v ghesicht, een hebt verspiet Want d’absentij van liefs lief, doet het herte knaghen Daerenteghen die presentij, blust alle verdriet Gheen dinck zoo solacelijck, dan datter gheschiet Tusschen twee gelieuekens, sonder violentij Want buyten d’aenschouwen, ist toch al niet Van een schoon personage, verstaet mijn intentij Maer liefd’ baert vrede, in sliefs presentij Dus stel ick den oorspronck der liefden in frage Wt het aenschouwen van een schoon personage. Liefd’ baert vrede. Per Yselueer. Vorige Volgende
Auteursrechtvrij