Diversche refereynen ende liedekens, uut Hollant, ende Zeelant(1582)–Pieter Sterlincx– Auteursrechtvrijvan verscheyden beminders der Consten ghelesen, ende gesonghen, inde Heerlijcheyt van Heenvliet, Ten versoecke van Peeter Sterlinx, den derden September 1580 Vorige Volgende [Folio B8r] [fol. B8r] Met minnen versaemt. Refereyn. Damoureuse gheesten o Venus dienaren Geminders der persoonen wt Adam gebouwen Waer deur haer die liefde eerst comt openbaren Moet ick verclaren // sonder benouwen Het wencken der ooghen en dlieffelijck aenschouwen Doet een mensch het hert inwendich verblyen Want door tghesicht van schoone vrouwen Coemt de liefde den mensch aldereerst bestryen Ghelijck als Leander mocht niet langher lyen Hem te deruen als hy haer sach staen Het ghesicht dede zijn herte tot haer vlyen Als hy aenschouden haer schoonheyt seer wel ghedaen Hy is dickmael snachts wt zijns vaders huys gegaen Om zijn liefde t’aenschouwen die ter werelt leeft Wt het ghesicht die liefde haren oorspronck heeft. Niemant ter werelt en can liefde draghen Sonder tghesicht van haer eerbaer wesen Want daer wt coemt den oorspronck der liefden jagen Soo datse terstont int hert is ghepresen Want alleen haer schoonheyt wtghelesen Doen die sinnen veranderen haestich en ras, En brengt die ghedachten in grooter vresen Hoe datment best soude brenghen te pas Om eens by haer te comen, daer sy was Want die ooghen slaepich op haer staen en stralen Sy besichten al haer leden soo blanck als vlas Haer wanxkens ghebloost, dmondeken root als coraele Thert verheucht hem door haer wel sprekende taele, Soo datmen hem terstont tot haer begheeft Wt het ghesicht die liefde haren oorspronck heeft. [Folio B8v] [fol. B8v] Onstack Paris niet als hy Helena quam ontrent Van liefden die hem tot haer ginck draeghen Want duer die Troyaenen quamen in torment Dat hy duert ghesicht in haer kreech behaeghen En noch al meer die soo vrouwen saeghen Ghelijck Meleager die hem ghinck vermeyen En vant spaceren in bosschen en haeghen Die schoone Atalanta met haer beyen Het ghesicht ghinck hem terstont tot haer leyen En sprack tot haer, O schoon Maecht vol eren Wat grooter gheluck sal hem Venus bereyen Die ghy o Atalanta tot een man sult begheeren T’ghesicht de hem door haer schoonheyt die sinnen verkeeren Dat hy zijn rome seyt aent wilde verschen heeft becleeft Wt het ghesicht die liefde haren oorspronck heeft. Prince. Princelijcke minnaers die Venus beminnen Moeten eerst doort ghesicht aende liefde raecken Eer datse can comen int herte binnen, Oft die ghedachten met haer schoonheyt vermaecken, Want duert gesicht moet den brant der liefden eerst blaecken Ghelijck Esacas Nimphe sach staen op een riuiere Doen stelden hy hem tot loopen om te ghenaecken Haer blanck lichaem dat hem thert de vercieren En haer eerbaer wesen reyn van maenieren, Maer als zy hem sach, nam zy den loop veure Soo langhe dat zy quam by een wilt diere Dat haer terstont heel ghinck verscheure, Doen hy dat sach begonst hy te treure Nu beclaech ick dat ghy door my hebt ghesneeft Wt het ghesicht die liefde haeren oorspronck heeft. Hope troost my. Perwael. Vorige Volgende
Auteursrechtvrij