Diversche refereynen ende liedekens, uut Hollant, ende Zeelant(1582)–Pieter Sterlincx– Auteursrechtvrijvan verscheyden beminders der Consten ghelesen, ende gesonghen, inde Heerlijcheyt van Heenvliet, Ten versoecke van Peeter Sterlinx, den derden September 1580 Vorige Volgende [Folio B3r] [fol. B3r] Refereyn. Hoort ghy menschen kinderen altesamen Laet af van sonden, wilt Christelijck leuen, Want doort Cruys, en lijden, oyt Gods kinderen quamen Int boec des leuens te werden gescreuen, Dus volcht Christum naer, wilt tvleesch lusten begeuen Sterft vry inden Heere, die eeuwich en altijt Is leuende, soo werdy naer die doot verheuen Want tleuen van een Christen, is hier eenen strijt Om van duuel, helle, en doot, te werden ghevrijt En die victorie Christi te moghen verweruen In lichamelijcke doot, haren Gheest verblijt En die tweede doot, en sal haer niet bederuen Dus hier truerich leuen en vrolijck steruen Die herboren menschen, naer schrifs bewijsen Die gheloouen in Christus glorieus verrijsen. Die staen om met Christo te verrijsen in glory Strijden met den schilt des gheloofs hier perfect Verlanghen naert d’eynde op dat zy victory Moghen beuechten, en d’aertsche hutte beulect Mach weder inde aerde werden ghestrect, En vernieut daer naer, in een eewich wesen Voor Christum, ter glorie van der door verweckt Die den eersten is, daer toe wt ghelesen En dees Medecijn-meester, sal haer ghenesen Van die wonde des doots, waerom zy met treuren Hier leuen, ia Christus seyt selfs van desen Die volstandige ten eynde sal t’rijck ghebeuren Dus dit zij die herboren leuen, vol doleuren En steruen vrolijck om haer ziel te spijsen. Die gheloouen in Christus glorieus verrijsen. [Folio B3v] [fol. B3v] Het verrijsen glorieus zy in Christo soecken Door wien men alleen mach tot den Vader comen Waerom sy hem het Cruyce te draghen vercloecken Wetende dat t’Cruyce moet op zijn ghenomen En Christus gheuolcht, sonder door te schromen Inden gheest soeckende, alleen dat bouen, is Om te werden bevrijt vant eeuwich verdomen Dus een waer Christen weynich in vorsten houen, is Godt aensiet gheen persoon, daer hy af te louen, is By hem en ghelt besneden, noch onbesneden Maer nieu herboorte, die vande werelt verschouen, is Dus ist dat svleesch lusten hier onder treden En verblijden inden doot, die herboren leden Christi, door den gheest, die haer doet veriolijsen Die gheloouen in Christus glorieus verrijsen. Prince. Den prince Christus sal inde wolcken te moet Den gheloouigen comen, en int rijcke halen Die wt den ghelooue leuen, by wien men doet Den wille des Vaders, dus sal hy haer betalen Met eeuwige vreucht, en zijnen wijn wt schalen Der vreuchden schencken, soo dat noyt ooc heeft gehoort Sulck een melodye, maer den boosen sal dalen Inden afgront, door maledictie van Christus woort Dus zijn die treurich leuen, op dat soude versmoort Wert door t’gheloof, dat in Christo Iesu staet Met ghewisse hope ter doot gaende voort Vrolijck inde liefde Christi, haren Advocaet Die wederboren inden Gheest van Godt metter daet Wiens naem zy eewelijck sullen prijsen Die gheloouen in Christus glorieus verrijsen. Aensiet liefd’. Vlaerdingen. Vorige Volgende
Auteursrechtvrij