Refereyn.
Het heeft ghelieft eenighe constenaren
Ons Rethorijckelijck, int wijs te vraghen
Wat menschen haer int leuen. met trueren beswaren
En vrolijck steruen in haer daghen,
Waer op datmen veel antwoorden can gewaghen
Want deen mach roemen, den behoeftighen altijt,
Dander, den Crancken, die dick treurt met vlaghen
De derde, den Blinden in swerelts crijt,
Eenighe, den Stom doouigen sonder iolijt,
Andere, de wtsinnighe die altijt tieren,
Veel voeren oock eenen heftighen strijt
Segghende, t/zijn dees haetnijdighe ghieren
Die met alle menschen twisten in veel manieren
Dan ick wegghe te wesen, dit wel doorsweruende
S’werelts afgrouw, in goeder conscientij steruende.
Om dit te bewijsen, soo moeten wy aenmercken
Van wie de werelt een afgrouwen heeft,
Dat zijn alle vrome, godtsalighe, clercken,
Daer voor dat zy als een misdader beeft,
Ghemerckt alsulcken tot deuchden exempel gheeft,
Die de werelt oyt haette, en altijt haeten sal
Dies een Godtsalich mensche, treurich leeft
Ende dat wt twee oorsaecken, vol van misual
Deerste is de boosheyt, die zy in groot ghetal
Voluert, teghen d’eenvoudighe die Godt vreesen,
Het tweede, dat soo menich duysent menschen al
Daer in versmoren, soo wy moghen lesen
En al sien sy de wonde, tis quaet om ghenesen
Waer deur ick schrijue, als dit eruende
Swerelts afgrouw, in goeder conscientij steruende.
| |
Wat afgrouw hadden D’israheliten in veel saken
Tegen den vromen Moyses eendrachtich
Insghelijcx zy alle Propheten verstaken
Ia grouden mede teghen de waerheyt almachtich
Oock teghen zijn Apostelen, leerende crachtich
Als ghesonden boden, van Godt vercoren
Het was haer alle eenen grouwel prachtich
Alst noch daghelijcx is, soomen mach sien en hooren,
Niet dat ick segghe, dat dees duytsche doctooren
Die daer roepen Christus is hier ende daer,
Inde rechte waerheyt hebben ghesworen,
Want Godt sal dat noch maken openbaer,
Maer die eenvoudich godtvreesende zijn voorwaer
Daer van ick mach segghen, mijnen kerf keruende
Twerelts afgrouw, in goeder Conscientij steruende.
Waer in een goede Conscientij ghelegen // is
Connen alle menschen seer wel weten
Soo zy treden in haer selfs weghen // wis
Met eenen knaghenden worm, die altijt wil eten,
Want so die quaet tuycht, elc wacht hem van vermeten
Teghen Godt, die hert e nieren deursiet,
Maer laet hy ons ongequelt, als wy zijn gheseten
Om te ouerpeysen onse misdaden iet,
En in sonderheyt als ons de doot nope biet
Soo sullen al sulcke treurighe menschen
Vrolijck steruen, deur haer goede conscientij siet,
Want zy verrijsende winnen haers herten wenschen,
Daer de werelt afgrouwt, met volle penschen
Dat zijn de ghene die daer zijn verweruende
Swerelts afgrouw, in goeder conscientij steruende.
Corrigez sans Reproche.
Briele.
|
|
Auteursrechtvrij