Diversche refereynen ende liedekens, uut Hollant, ende Zeelant(1582)–Pieter Sterlincx– Auteursrechtvrijvan verscheyden beminders der Consten ghelesen, ende gesonghen, inde Heerlijcheyt van Heenvliet, Ten versoecke van Peeter Sterlinx, den derden September 1580 Vorige Volgende [Folio B1r] [fol. B1r] Refereyn. Hoe vele diuersche Godts geest haer beroemen Malcanderen door gebruijc van Religie verdoemen Recht of die salicheyt hinc aen een wterlijc pant Dat zy niet en doet ant: Wt die gront des herten, moet die duecht voortcoemen Dan die Ioden wilden oock haer heylich noemen Om die besnijdenis dien zy hielen vaillant Maer Godt die bevant Haer herten onbesneden, dus sloech haer Godts hant, Want die reyne van herten sullen Godts rijcke eruen Dus wert nu ghevraecht met cloeck verstant Wat menschen truerich leuen, en vrolijck steruen O Godt laet mijnen geest daer verstant van verweruen Heere naer u woort soude ick daer voor achten Want ghy sult daer in eeuwicheyt niet bederuen Die herboren door den geest, Godts rijck verwachten. Die herborene Godts, zijn niet vleeslijck gesint Vyanden des werelts is datmense vint Soecken hier ter doot haer sondighe leden Voor den gheest te treden, Sy haer men niet eerts, maer wat hemels is bemint Den gheest in haer alle aenvechtinghe verslint Om den dach des verlossinghe wert by haer ghebeden Om te rusten met vreden Inden Heer, want zy weten dat hier beneden Der Christenen leuen, niet is dan eenen strijt Doende als Godts kinderen, vant beghin oyt deden Niet soeckende dan dat Hemels is altijt, Want die doot is eenen doorganck, dies zeker zijt Tot den leuen: voor Christelijcke ghedachten, Omm te Christo in zijn Rijck te worden verblijt Die herboren door den geest, Godts rijck verwachten. [Folio B1v] [fol. B1v] Die herboorte en compt inden water niet, Maer wt den water, die Godts kinderen geschiet Inden Gheest van Godt den almachtighen vader Haer drucx ontlader: Die haer tot Christum trect, dus wat Christus gebiet Sy haer men inde cracht volcomen siet T’rijcks niet int woort, dus Godts kinderen te gader Wt vierigher aeder: Inde cracht des woorts, haer tijt comen nader Verlangende na themelsche eewich wesen, Elck is van haer een wellust versmader Wetende dat Christus van der doot is verresen En dat sullen verrijsen, zijn wtgelesen Die haer offer oyt tot hem recht op brachten Dus leuen treurich, en steruen vrolijck door desen Die herboren door den geest, Godts rijck verwachten. Prince. Den eenighen Prince Christus die sal gheuen Al die dus volstandich in hem zijn ghebleuen Als zijn vaders beminde wtvercoren Sijn rijcke te voren Tot zijn rechter handt sullen zy op zijn geheuen Want zy staen int boeck des leuens gheschreuen, Dus den arbeyt en sal dan niet zijn verloren Vanden weder gheboren, In welcke men hier tribulatie ach sporen Want zy met Christo haer Cruyce hier draghen Verblijden, als die doot tlichaem compt verstoren Soeckende alleen den Heere te behaghen, Ick segghe swerelts lusten achter in voor plaeghen En met die doot zy haer pijne versachten Mits alleen naer den dach Christi vraghen Die herboren door den geest, Godts rijck verwachten. Aensiet die Ionckheyt. Schiedam. Vorige Volgende
Auteursrechtvrij