Diversche refereynen ende liedekens, uut Hollant, ende Zeelant(1582)–Pieter Sterlincx– Auteursrechtvrijvan verscheyden beminders der Consten ghelesen, ende gesonghen, inde Heerlijcheyt van Heenvliet, Ten versoecke van Peeter Sterlinx, den derden September 1580 Vorige Volgende [Folio A7r] [fol. A7r] Refereyn. Ick ben seer ghequelt met fantasyen Om dat my onlancx is gheopenbaert Een questie, die ick voor u hier sal belijen Waer door mijn herte is gheweest beswaert Maer om te thoonen Retorices aert En solutie te gheuen, om sprijs verweruen, Op dese vraeghe seer wijsselijck verclaert Wat menschen treurich leuen, en vrolijck steruen T’zijn Godts wtvercoren die zijn rijck sullen eruen Want zij daghelijcx lijden om zijn Goddelijck woort Dese woorden veracht als ghebroken scheruen Hier by deser werelt met groot discoort Dit doet haer treurich leuen, soot wel behoort Maer tot een vrolijck steruen sullen zy haer weeren Die daghelijcx lijden, om twoordt des Heeren. Christus spreeckt ghy sult treuren en schreyen Wanneer die werelt sal vrolijck wesen, Maer wilt uwen tijt, met lijtsaemheyt verbeyen Soo sult ghy worden van druck ghenesen, Dus trueren zy daeghelijcx, die den Heere vresen Soo langhe zy hier opter aerden leuen, Want al wat werelt is, wordt van haer mispresen Dus en moghen zy haer tot gheen meucht begeuen, Maer peysen altijt om dat schrickelijck leuen Wanneermen sal hooren der Trompetten geschal, Staet op ghy dooden, als ons is beschreuen En coempt ten oordeel ghy goede en quaede al Dit doet haer trueren naer Ieronimus verhal Dus zijn dit de ghene, naer mijn solveeren Die daghelijcx lijden, om twoort des Heeren. [Folio A7v] [fol. A7v] Die haer leuen nae Godts woort hier stellen op aerden Sullen zijn die bruyt Christi, dat is waerachtich Sy leuen in suyuerheyt, trueren zy aenvaerden Met eenen ootmoedighen Geest zeer weerslachtich Door tgheloof in Christo, en zijn ghenaede crachtich Dees zijn ghewasschen door Christus bloet van sonden Sy houden haer reyn, weest dit ghedachtich En soecken Godt te behaeghen tot allen stonden, Sijn Goddelijck woordt, zij altijt vermonden Waerom zy veel lijdens op aerden draeghen, T’coempt door zijn heylich woort, twoort v ontbonden Maer zy wachten haer verlossingh tot allen daeghen Met weenen, en trueren, om Godt te behaeghen Dees sullen vrolijck steruen, naer Paulus leeren Die daghelijcx lijden, om twoort des Heeren. Prince. Dese haer zeer vrolijck tot sterue vueghen, Want zy hebben haer tijt met treuren verwacht Met die Enghelen Godts, sullen zy haer verhueghen In dat Nieuwe Ierusalem met heerlijcke macht Daer Godt met haer sal woonen, hier wel op acht En hy sal haer Godt zijn, soo Ioannes belijt Sy en sullen niet meer woonen dach noch nacht Want vande tweede doot zijnse bevrijt Die traenen worden zy van haer wanghen quijt Sy sullen als ghemeste Calveren springhen, Dese zijn van eeuwicheyt ghebenedijt Want zy gaen met Christo d’enge poort door dringhen Heylich, Heylich, is hy, sullen zy singhen Want haer weenen sal in blijschap verkeeren Die daghelijcx lijden, om twoort der Heeren. Aensiet die Ionckheyt. Schiedam. Vorige Volgende
Auteursrechtvrij