Diversche refereynen ende liedekens, uut Hollant, ende Zeelant

(1582)–Pieter Sterlincx– rechtenstatus



[Folio A3r]
Totten Leser. My dunckt dat ic alree, Momus aenschouwe, Berispende neerstich elck dinck bysondere, Geboren sonder vader, vanden nacht soo ic houwe: Om dit werc te berispen, van bouen tot ondere Seggende eat hier toch wert gepresenteerd voorwondere Een alsulcken Hoochwaerdigen Magistraet? Meent ghy dat zy sullen achten, ic sijt oorcondere, Eenich van dese Grillen, seer sierlijc van daet Ghy Presenteerden veel beter delicaet, Saecken die Wijsheyt, ende Raet, voort brachten, Off yet dat verquicten haer gemoeden desolaet, Die door Mars by na hebben verloren haer crachten, Dit hoor ic hem spreken: wie weet noch zijn gedachten? Ist waer Momus? v schimpen kent een ieder wel, Maer ghy en onthout der gheleerde sententie niet, Die daer seet, dat hy noyt en las schriften soo fel Hy en vant daer wat in, dat stichten siet, Soo salmen oock in dit Cleen stucxken vinden iet Dat stichtinge bringt, en den geest verfrayt: Diet nu niet en dient, als hijt wel heeft doorwiet Die sal op een ander tijt, daer mede zijn gepayt Dus Momus, ist al verloren ghecrayt Ic heb soo stout gheweest, dat ick den Raet eerbaer Dit heb gedediceert, al ist cleen in consten versprayt Tot een verbeteren ick seghe v eenpaer Want die geeft dat hy heeft, is niet te eyschen voorwaer.