Diversche refereynen ende liedekens, uut Hollant, ende Zeelant

van verscheyden beminders der Consten ghelesen, ende gesonghen, inde Heerlijcheyt van Heenvliet, Ten versoecke van Peeter Sterlinx, den derden September 1580

[fol. A3v]

Tot alle const beminders.

Al hoordy hier Pan met zijn grote fluyt
Op gheblasen teghen Appollo spelen,
Ick bidt v broeders zijt niet soo ruyt
Dat ghy int Oordeelen Midias wilt vervelen,
Nemet toch int goede, wilt fouten helen,
Om ij. oorsaecken, weerdich t’aenmercken,
Dierste dat lust om leeren, Onuerstant doet quelen,
Het tweede, dat eenige noch zijn ionge Clercken
In dese conste, alst blijckt aende wercken,
Vande geesten uyten Lande van voren
Men bout niet op eenen dach huysen, en kercken,
Niemant en is oock met de const gheboren,
Want ongebouden acker, draecht selden goet coren.