Diversche refereynen ende liedekens, uut Hollant, ende Zeelant

van verscheyden beminders der Consten ghelesen, ende gesonghen, inde Heerlijcheyt van Heenvliet, Ten versoecke van Peeter Sterlinx, den derden September 1580

[fol. A1r]

Diuersche Refereynen. Wt Hollant, ende Zeelant, van verscheyden beminders der Consten ghelesen, ende gesonghen, inde Heerlijcheyt van Heenvliet, Ten versoecke van Peeter Sterlinx, den derden September 1580.

Opde vraghe, Int Wijse:
VVat menschen treurich leven, en vrolic steruen.

Op de waghe, Int Amoureuse.

VVaer wt de Liefde, haren oorspronck heeft?

Ouden Reghel.

Lydt deen des anders fouten, zoo kent ghy v seluen.


Ende het Liedeken:


Hoe het Nederlant eertyden gefloreert heeft.

Ende hoe desolaet tselue nu leyt.

Seer Lustich om Lesen ende om Singhen.

Castijt sonder verwijt.

[fol. A2r]

Edele, erentfeste, VVyse, ende seer discrete Heeren, myn Heeren den Gouuerneur, Schouten, Commoignimeesters, Schepenen, Dekenen, Ghesworene, Tresoriers, ende Raedt der stadt Mechelen.

Edele, erentfeste, wyse ende seer discrete Heeren, also eenighe ionghe Practesynen inde Conste van Rethorica, binnen den Lande van Hollant ende Seelant, hoorden dat ic van meeninge was te vertrecken, soo synder vele niet te vreden gheweest, alsoo van my te scheyden, off ick heb haerlieden moeten belouen, dat sy van my souden ontboden werden op zekere vraegen ende regele, waermede sy haeren Constrijcken gheest van Rethorica mochten werckende scherpen, ende alsoo ghesamentlyck metten anderen een vriendelycke afscheyt nemen, waer in ick haer lieden te wille geworden sy, ende heb eenige gheesten (mitsgaders ettelijck Cameren van Rethorica) beschreuen binnen de heerlijckheyt van Heenvliet, al waer wy metten anderen lieffelijck inde Conste ghehandelt hebben, ende zoo voorts vanden anderen orlof ghenomen. Nu nademael Eersame Heeren, dat dese Parnasche Groeskens, gheweest zijn mynen Adieu by alle Mercurialiste ende Const beminderen, binnen ettelijcke plaetsen van Hollant ende Seelant, ende dat uwer E: ghelieft heeft, my voor uwer E: (ende der gemeenten) dienaer aen te nemen, zoo en heb ick niet kunnen ghelaten de selue Conste onder uwer E: naeme

[fol. A2v]

in druck te gheuen, ende uwer E: tot eenen willecom toe te dediceren. Niet twyfelende off uwer E: en sal de selue onder uwe Protectie nemen, ende dese cleene saecke my van besten houden, ter tijt toe, dat den Almogenden Godt gelieuen sal, dat ick uwer Eer: met wat meerders congratuleren can, VVt onse studium te Mechelen, desen lesten Iulij 1581.

uVVer E: goetvvilligen Dienaer

Peeter Sterlinx