|
| |
Vierde Handelingh, tweede wtcomst.
TIMBRE, PAGIE, BALACCO.
HOe hooch verheft den Heer der Heeren d'eene mensch
By dat hy d'ander doet, na syne Godtheyts vvensch!
Hoe overvloedich heeft den Hemel my ghezeghent!
VVat is my al ghelucks tot huyden toe bejegent!
Hoe meenich vvrede slach heb ic vvel helpen slaen!
VVat ben ic al ghevaers mijn leven door ghegaen!
En so van d'eene trap, tot d'andere gheclommen
Dat ic mijn staet nu acht meer als twee Hertochdommen
VVie isser by mijn Heer de Coningh so ghesien
Als ic? vvant vvat is vvil, dat sal terstont gheschien,
Van rijckdom ben ic vol, op t'beste van mijn leven
En nu ic my ghedenck hier tot de rust te gheven,
Beschict my Godt een Vrou, een Vrou, daer van ic vry
Mach roemen, dat gheen Prins ghelijcken heeft by my,
O groot zeghen Godts! vvie sou sich niet verblyden?
Te paeren met een maecht, de schoonste van haer tyden,
In vviens meer Goddelijck als Princelick ghelaet
| |
| |
De vriendelijcheyt selfs vol deucht gheschreven staet
Die in de Iaeren, daer de kintscheyt plach te vvoonen,
Haer selven so bedaecht van zinnen vveet te toonen
Dat elcken reden die haer vvt den monde vvijckt
Een lesse vol verstants, een gulde spreuck ghelijckt.
Van d'Opperheer begaeft, so met bevallicheden
Van Cuyscheyt, schoonheyt, deucht, als welgestelde leden
Dat d'aldervvijste mensch met reden segghen mach
Dat hy noyt in een Vrou so groote gaven sach
De Goden souden sich vervvond'ren in haer zeden
En in de vvijsheyt van haer vvel ghevoeghde reden
Maer dat ic noch het meest van al roemvvaerdich gis
Is, dat sy van ghemoet hier by noch nedrich is
VVant d'hovaerdye can door pracht sich so veer strecken
Dat s'alle deuchden van de menschen can bedecken.
Hier is een, die mijn Heer seer graech te vvoorde vvaer.
Seght dat hy binnen comt. Balacco, zijt ghy daer?
Ic vvensch mijn Heer geluc, hoe gaet het u Genade
VVat heeft u hier ghejaecht
Dat sou mijn Heer nau rade.
Dat's vvaer, ten zy ghy 'tseght,
Om cort te maken, Heer, de reden ons verbint
De ghene goet te doen daer van vvy zijn bemint,
| |
| |
En van het ghene dat haer eenichsins mocht schaden
(So veer als 'tdoenlick is) sorchvuldich af te raden,
Dus d'vvijl ick had ghehoort, dat u Ghenade sou
Sich aen Fenicie verbinden door de trou
En cond' ic (alhoevvel het my leedt vvas van herten)
Niet laten, u (mijn Heer) t'ontdecken hare parten
Ick hadde vvel ghevvenscht en yverich vervvacht
Dat u een ander dese bootschap had ghebracht
Maer loffelijcke Vorst, het soud my eeuwich rouvven
Dat u Genaed' een Hoer sou tot sijn Huysvrou trouwen
Ghy fielt, vvat seght ghy daer?
Onstelt u niet mijn heer, het geen ic segh, is vvaer,
Ic heb het meer als eens gesien met dese oogen,
VVat vult ghy veel mijn oor met een versierde loogen?
Tis alte waer, mijn Heer, ic heb een trouwe vrient
Die by haer boelt en slaept so dickvvils al 'them dient
Iae alle nachten meest (och! dat ic het mocht svvygen!)
VVeet met een ledder tot sijn venster in te styghen.
Hoe? ick gheley hem daer mijn Heer
Mijn Heer die mach het vvel voorseecker vast ghelooven.
| |
| |
Dat ic mijn vrient daermee sijn vvellust niet sou roven
En my, mijn Heer toeseyd, dat hem niet sou misschien
Ick sou hem brenghen, daer hy 'tselfs sou moghen sien,
Als 't u Ghenade dan sach met syn eyghen ooghen
So vvas hy ymmers niet door pratery bedroghen,
Hoe suft ghy so mijn Heer? dits teghen uvven aert
Is dan een loose Hoer u so veel treurens vvaert
Die met een cuysche schijn haer Gaylheyt vveet te decken
Laet die u hert so seer tot droefheyt niet vervvecken.
Ha! Hemel, vvat ic hoor! Balacco wel, vvilt ghy
De plaets daer ic het sien sal moghen, noemen my,
Ick svveer u by mijn trou, op Edelmans gheloove
VVaer toe ic roep tot tyug' den Rechter van hier boven
Dat ic in 'tminsten niet, noch u, noch uvven vrient
Misdoen sal, maer alleen, daer comen daer 't u dient
En sijn vvellusten so heymlijck by my bevvaren
Dat ic het niemant sal ter vveerelt openbaeren,
Hy bruyck sijn liefde vry, ic gun hem het ghenot
Van die hem so bemint, en met my drijft den spot.
VVel vvilt dan 'tavont, ten thien uren, by de linde
V laten inde straet van S.Iacome vinde
Daer sal mijn Heer dan sien, dat hy niet gaeren sach
Vaert ondertusschen vvel.
| |
| |
VVat heb ic daer gehoort! ic schijn voorwaer te dromen
Sou dan d'oncuysheyt in Fenicies herte comen?
Sou dan de Ionghe Maeght vvel comen in de zin
Te minnen andre meer, als my, die haer so min?
Het schijnt my vry wat vreemts, ist mog'lic? can 'tgeschieden?
Dat sy, die mijn versoeck so aerdich vvist te vlieden
Onder het decksel van de Cuysheyt, en haer eer,
Sich selven sou daer in te buyten gaen so seer,
En my bedrieghen dus met list, die in 'tbysonder,
In haer stantvasticheyt nam 'taldergrootste vvonder?
Het schijnt my vry vvat vreemts, maer vvat? het sal gheschien
So my Balacco seyd' dat ick het selfs sou sien
Nu 'k vvil my derwaerts spoen, en mijn gemoet bereyden
Om d'vvtcomst vande saeck daer duldich te verbeyden.
|
|
Auteursrechtvrij