Uvaerachtige Historie ende beschrijuinge eens Landts in America gheleghen, wiens inwoonders Wilt, Naect, seer godtloos, ende wreede Menscheneeters zijn

✠ Hoe gheschickt dat si lieden syn om wilde dieren ende visschen te schieten met pijlen.
Dat .VIII. Capittel.

ALs sy int bosch gaen oft by den watere soo hebben sy altoos haren boghe ende haer pijlen by haer. Ende alsoo si int bosch gaen, hebben sy altijt haer gesicht om hooge na die bomen, in achter ende voor. Ende als sy wat vernemen van groote voghelen, mercatten oft anders sins eenighe dieren die haer op die boomen houden, gaen toe, ende legghen toe om te schieten, volghende haer so langhe nae tot dat sy wat vangen. Selden ghebueret als een wt gaet na dat weyde werc, dat hy ledich thuys coempt, Desgelijcx volgen si die visschen na vast by den oeuer vander zee, sy hebben ooc een scherp gesicht, want als hem erghens eenen visch verheft, daer schieten si na, luttel schueten faelgeren si, ende als si eenen getreft hebben springhen si int water ende swemmen hem nae. Sommighe groote visschen als si den pijl geuoelen gheuen haer seluen te ghronde, ende dye selue duyckelen sy nae wel tot ses vademen diep, ende brenghen die mede. Sy hebben henghelen ende netten, ende dat garen daer sy die af maken oft aen een vlechten trecken si van lange scherpe bla-

[fol. I3v]

deren, welcke sy Tockaun heeten, ende als sy metter garen oft netten visschen vanghen willen, so vergaderen haerder sommighe by malcanderen, een yeghelijck heeft sijn beteekende plaetsen ende eenen hoeck waters daert niet diep en is. Dan gaen sommighe ende slaen int water cruyswijs door een dan so loopt de visch nae de diepte, ende comt haer alsoo in haer garen, die dan het meeste vangt die deylt den anderen mede. Daer comen oock dickwils toe die verre vander zee woonen, ende vanghen veel visschen tsamen bradense heel dorre, stootense ende maken meel daer af, dwelck sy wel drooghen ende malen, also dat langen tijt dueren can ende dat voeren si mede thuys, ende eten wortelen meel daer toe, maer souden sy die visschen ghebraden mede thuys voeren, sy en souden niet langhe dueren, want sijse niet en souten. Oock packtmen dat meel beter by een ende daer gaets meer op eenen hoop dan vanden gebraden visschen.