Nvchteren Loth. Dat is, middel om op te staen, uyt de ziel-verderffelijcke sonde, van dronckenschap, tot een maetich, ende godtvruchtich leven

[fol. ***4r]

VVetten Teghens Dronckaerts.

1.

Laertius Lib. 1. Cap. 5.

PIttacus Mityleneus liet de dronckaerts, indien sy yetwes misdeden, met een dobbele straffe straffen, op dat sy door vreese der straffe, hen te beter van den Wijn onthouden souden.

2.

Alexander ab Alex. Lib. 3. Cap. 11.

De Indianen en droncken gheenen Wijn, dan alleen in haeren Godesdienst, ende hadden een sulcken Wet, dat, so wat vrouwe een droncken Coninck ombracht, sy dese gifte daer voor bequam, dat sy met den succederenden Coninck ghetrout werde.

3.

Laertius in vita Solonis.

De Atheniensen, alsoo sy de dronckenschap in allen menschen verfoeyden, doodeden oock, na de Wet van Solon, haeren Prince, te wat tyde sy hem bevonden droncken te zijn.

4.

Athenod. Lib. 10. Cap. 9.

Zaleucus hadde een Wet onder den Locrensen ghegheven, so daer yemant ghevonden werde, die Wijn dronck, sonder daer toe, van eenen Medecyn-meester, tot gesontheyt des lichaems last te hebben, dat hy soude onthalst werden.