Logo DBNL
Nederlandsche gedichten uit de veertiende eeuw van Jan van Boendale, Hein van Aken e.a. (1869)

Nederlandsche gedichten uit de veertiende eeuw van Jan van Boendale, Hein van Aken e.a.

(1869)–F.A. Snellaert–rechtenstatus Auteursrechtvrij

Vorige Volgende

Hoe die Yoden, die Alexander besloet, selen comen en̄ selen die werelt weder destruweren. C. XI.

 
NU als tfolc / dat ic vore seyde /
 
Sit in sire weldecheyde /
 
En̄ naden vleesche leeft /
 
En̄ Gods vrese vergheten heeft /
930
En̄ altoes also waent staen /
 
Dan selen werden ontdaen
 
Die porten / daer die here groet /
 
Alexander / die Ioden in sloet /
 
Die meer dan .ijm. jaer
935
Ghesloten hebben gheweest daer /
 
Die hi daer in sluten dede
 
Om hare grote ondadechede /
 
En̄ om haer onnuttelijc leven
 
Dat si sonderlinghe bedreven.
940
Al was Alexander een tyran /
 
Hi verbat Gode nochtan
 
Dat dese Ioden besloten worden /
 
Daer si nie sint wt en torden.
 
Dese Ioden met groten hopen
945
Selen wt comen ghelopen
 
Inder ghelike en̄ inder ghebaren
 
Oft verwoede wolve waren /
 
En̄ alt volc van groter duchte
 
Sal hem maken ter vluchte /
950
Sonder beyden en̄ sonder weren;
 
So zere salt hem dan verweren;
 
En̄ selen hen in bossche berghen
 
En̄ oec in holen en̄ op berghen /
 
So datter vele sal sterven
955
Van vreesen ende bederven.
 
En̄ die Ioden en sal nieman
 
Ter erde besteden dan.
 
Dat quade volc / wildijt weten /
 
Sal vleesch van menschen eten /
960
En̄ van beesten drincken dbloet /
 
Dat sal hen duncken harde goet.
 
Si selen eten in haren doene
 
Beyde serpente en̄ scorpioene /
 
En̄ dode corren daer sise vinden
965
Selen si eten ende verslinden.
 
Adren / slanghen / sijts gewes /
 
En̄ dat onmenschelijc es /
 
Selen si tetene bestaen.
 
Vrouwen die met kinde gaen
970
Selen si opdoen sonder ducht /
 
En̄ eten die ongheborne vrucht.
 
Die lande selen si struweren
 
En̄ al in vulecheden keren /
 
En̄ nieman en sal wesen so coene
975
Daer jeghen iet te doene.
 
Lieve vriende / nu mict dan
 
Hoe God / Onse Here / castien can
 
Sine vriende / si lude si stille /
 
Die Hi bi Hem houden wille.
980
Ic segghe u dat waerlike:
 
En comt nieman in hemelrike
 
Hine moest proeven / eest cort eest lanc /
 
Des drancs daer Cristus af dranc /
 
Also Cristus selve seyde
985
Metten monde der waerheyde /
 
Met doghene en̄ met wederspoede /
 
Met arbeyde of met armoede /
 
Of met smade / sijt seker das /
 
Dat sonder Cristus niet en was.
990
Die dese heeft in ertrike /
 
En̄ diese nemt verduldechlike /
 
Die moet comen / te waren /
 
Daer Cristus voer es ghevaren.

Vorige Volgende