Logo DBNL
Nederlandsche gedichten uit de veertiende eeuw van Jan van Boendale, Hein van Aken e.a. (1869)

Nederlandsche gedichten uit de veertiende eeuw van Jan van Boendale, Hein van Aken e.a.

(1869)–F.A. Snellaert–rechtenstatus Auteursrechtvrij

Vorige Volgende

Dat vele liede tkersten ghelove noch selen laten en̄ Onsen Here afgaen. C. IX.

 
ONse behoeder Ihesus Cristus
 
En̄ die heylighe Paulus
 
Segghen / dat in desen tiden
705
Tghelove zere sal liden /
 
Ende dat si die schenen die beste
 
Verkeren selen in dat leste /
 
En̄ dat Kerstenheyt begheven /
 
En̄ als heydene liede leven /
710
Also dat tghelove dan al
 
Bina te nieute werden sal;
 
Ia / sonder slach en̄ sonder stoet /
 
En̄ sonder bedwanc van enegher noet /
 
Salder vele utermaten
715
Dat kerstijn ghelove laten /
 
En̄ aen dat ghelove keren
 
Dat hen die duvel sal leren.
 
Noch so seyt Paulus
 
Voert dese worde aldus:
720
Inder lester tijt / sonder waen /
 
Selen wreede tide ingaen
 
Dat die menschen buten en̄ binnen
 
Hem selven zere sullen minnen /
 
Gode ontsien groet no clene /
725
Hoverdech van moede en̄ onrene /
 
Sonder minne sinen evenkersten /
 
Alle doghet sal hen ghebersten.
 
Minnen salmen die quade /
 
En̄ den goede doen onghenade;
730
Voer oghen vrienscap toghen /
 
Maer verraden achter die oghen.
 
U mach duncken dat ic langhe
 
Op dese materie hanghe;
 
Maer wet dat inder waerheyt /
735
Datter blatijn vele meer af seyt /
 
Ia noch also vele alsic u
 
Hier vore hebbe gheseghet nu.
 
Nu salmen sien claer en̄ sijn /
 
Welc die quade of die goede sijn.
740
Dit sal sijn / sonder missen /
 
Die tijt van proefenissen:
 
Hier salmen openbaer kinnen
 
Hen die Gode met trouwen minnen;
 
Want die in noet herderen /
745
En̄ volstaen sonder verkeren /
 
Dat selen die sijn waerlike
 
Die verdient hebben dat hemelrike.
 
Oec salmen kinnen / te waren /
 
Die ghene die quadijen waren.
750
Daer om vorsprac God Onse Here:
 
Als men persequeert sere
 
En̄ vernoye doet en̄ doghen
 
Om minen wille / suldi verhoghen
 
En̄ blide sijn en̄ verduldech;
755
Want u loen wert menechfuldech.
 
Dus ghepersequeert waren si / twaren /
 
Die propheten die vormaels waren;
 
En̄ die ten inde volherden
 
Selen alle behouden werden.

Vorige Volgende