Nederlandsche gedichten uit de veertiende eeuw van Jan van Boendale, Hein van Aken e.a.

Een ander poent van ghemeynen goede. C. XIV.

DAnder poent dat Onse Here
Gherne wreect ende zere /
Dats datmen ghemeyn goet
Niet en bekeert / des sijt vroet /
Ghetruwelijc so daer toe hoert /
Noch te poente en settet voert /
Daer af dat ic u te hant
Een groet deel hebbe doen becant.
Nochtan so willic u dat
Verclaren een luttel bat.
Wisten heren vanden staden
Waer met dat si sijn gheladen/
En̄ hoe God / voer waer ghesproken /
Dic over hem heeft ghewroken /
Alsic hebbe gheseghet vore
En̄ also ghi noch moghet horen /
Si souden met rechte / sonder waen /
Met anxte dicwile slapen gaen.
Ic wiste inder waerheyt dat /
Dat portre van eenre stat
Tscependom tenen tide jeghen
Den here vander stat vercreghen
Om ene somme van ghelde /
En̄ als si hadden in ghewelde

[p. 326]

1130

Die stat / hebben si vercocht

 

Daer op ene grote lijftocht /

 

En̄ betaelden den here also

 

Dat si hem hadden gheseghet toe.

 

Dus moeste die ghemeente / voer waer /

1135

Der heren heerscapie quiten daer;

 

En̄ alle die dit verworven /

 

Haesteliker doet si storven

 

Sonder dat heylighe Sacrament /

 

Alse liede van Gode ghescent /

1140

En̄ som worden si verslaghen

 

Te scanden al haren maghen.

 

Lieve kindre / nu merct dan

 

Hoe God Onse Here wreken can.

 

Doen die Romeynen wilen ere

1145

Trouwe hanteerden ende ere /

 

Dwonghen si al ertrike;

 

Maer doen si wouden sijn rike

 

En̄ vernaemt aen tghemeyne goet /

 

Vielen si neder onder voet /

1150

En̄ hebben dere al verloren /

 

Alsic u seyde hier te voren.

 

Hadden si wel opghedraghen

 

Ghemeyn orber / als si plaghen /

 

God Onse Here en hadse met allen

1155

Dus zere niet laten vallen.

 

Voer waer so segghic u dat /

 

Soe waer die rade van eenre stat

 

Haers selfs baten sueken mere

 

Dan ghemeyn orber oste ere /

1160

En̄ daer men oer / des sijt vroet /

[p. 327]

 

Elken niet recht en doet /

 

Es hi mate of wel gheboren /

 

Daer so es die stat verloren.

 

Een wijs man maect ons vroet:

1165

Stat daer men gheen recht en doet

 

Die es als een wout / des gheloeft /

 

Daer men die menschen in beroeft

 

En̄ lijf en̄ goet nemt dan:

 

Die stat sal scuwen elc wijs man.

1170

Elc raedsman sal sonder letten

 

Sijns selfs orber achtersetten

 

Om den ghemeynen orber vander stede.

 

Dat sal van rechte sijn sede.

 

Aen ghemeyn orber leghet mere dan

1175

Aen den orber van enen man.

 

Die meeste orber sal / sonder waen /

 

Altoes voer den minsten orber gaen /

 

Ghelijc dat der kerken heren

 

Gods volc weghen ende regeren

1180

Also verre / dat verstaet /

 

Alse dat ane die ziele gaet /

 

En̄ hare rechte vast houden;

 

Also ghelijc oec so souden

 

Die heren van eenre stede

1185

Gods volc bewaren mede

 

Aen sijn goet en̄ aen sijn lijf /

 

Die de rechte houden stijf /

 

En̄ voer ghemeynen orber setten

 

Lijf en̄ goet / sonder letten.