Nederlandsche gedichten uit de veertiende eeuw van Jan van Boendale, Hein van Aken e.a.

[p. 249]

Vander biddender ordenen. C. XXXVIII.

WOuter / van desen mendicanten
Moetic u een luttel ranten /
Alse minderbrueden en̄ jacopine /
Witte brueder en̄ augustine /
Die lopen weder en̄ voert
Prediken Ons Heren woert
Den leeken volke openbare.
Ic vruchte dat si al dware
Niet en segghen en̄ en leren /
Daer sise biechten en̄ absolveren;
Want si vleyende en̄ volghende sijn
Hem die hem gheeft broet en̄ wijn.
Bedi si moeten leven
Van datmen hem¹ sal gheven /
Daer groet perijl in leghet /
Als ons een wijs man seghet:
Wie arm es en̄ niet en heeft /
En̄ met goeder spisen gherne leeft /
En̄ aen bidden leghet sijn lijfnere /
Die moet sijn een smeker sere;
En̄ wie smeect / also wi lesen /
En mach niet gherecht wesen;
En̄ den ongherechten moetmen scuwen /
En̄ den smeker niet betruwen /
Also alse die wise segghen
Die scrifturen in boeken legghen.

1 Hs. hen.

[p. 250]

3340

Hoverde / ghierecheyt en̄ nijt

 

Vindic in gheestelijc abijt

 

Vele meer / sijts gewes /

 

Dan in enech volc dat es /

 

En̄ oec luxurie bedect /

3345

Daer der vele mede es bevlect.