Print Nederlandsche gedichten uit de veertiende eeuw van Jan van Boendale, Hein van Aken e.a.(1869)–F.A. Snellaert– Auteursrechtvrij Vorige Volgende Vanden levene daer men mede comen mach ter zalichheden. C. XXVIII. IAn / wat leven salmen leyden Mede te comene ter salicheyden 2400[regelnummer] En̄ ten hoghen lone van hemelrike? Wouter / harde lichtelike Mach die mensche verdienen des Dat hemelrike sijn es / Die de gratie heeft te Gode. 2405[regelnummer] Men houde de .X. ghebode / En̄ men leve van weken te weken Also men tsondaeghs hoert spreken Den prochiepape / en̄ ghebieden Inder kerken den lieden. 2410[regelnummer] En̄ dat elc / spade en̄ vroe / Sinen evenkersten doe Also hi woude datmen hem dade / Hier met vindt hi ghenade Voer Ons Heren aenschijn. 2415[regelnummer] Helpe Ian! hoe mochte dit sijn? Minderbrueder ende Iacopine / Die meesters sijn in divine Si schinen dat si weten algader [pagina 219] [p. 219] Die verholenheyt des Vader / 2420[regelnummer] En̄ maken ons den wech so swaer Dat cume yeman mach comen daer / So meneghen grindel starc ter core Scieten si voer die dore. Wouter / ic spreke als Iacob sprac: 2425[regelnummer] Ic woude de ghene die so strac Den wech maken en̄ so inghe / Dat si poertiers sonderlinghe Ter hellen worden ghesat / Si souden so nauwe houden tgat 2430[regelnummer] Daer en soude nieman comen in / Dat mach elc merken in sinen sin / Na dien dat si hemelrike Sluten also starkelike. Wouter / dats mijn ghelove claer: 2435[regelnummer] En es gheen sondare also swaer Hem en rouwen dicke sijn sonden / En̄ oec in meneghen stonden Doet hi sonde met groter vreesen; Want dat mochte qualike wesen 2440[regelnummer] Daer naturlike verstannesse es binnen En doet hem dicke hare sonden kinnen; En̄ oec en es nieman also quaet Hi en doet selcstont weldaet / Of hi en hevet eneghe doghet an / 2445[regelnummer] Waer bi dat hem God an Sijnre gracien vele te bat / En̄ houdt hem emmer te staden dat. Mijn ghelove es dat Onse Here Den mensche mint also sere [pagina 220] [p. 220] 2450[regelnummer] Dat hi ocsuyn suect / nacht en̄ dach / Hoe dat hine behouden mach / En̄ elken mensche / es hi traghe of haest / Haelt hi als hi hem es naest. Oec seghet een wijs man aldus / 2455[regelnummer] Diemen heet Cesarius: Kennen wi onse sonden en̄ weten / So heefter God al vergheten. Aldus so suect Onse Here Altoes orsuyn ende kere 2460[regelnummer] Hoe hi den sondare mach behouden / En̄ leghet in so menegher vouden Datment ghesegghen niet en mochte; Want hi ons harde diere cochte Met sijns selfs heylighe doet. 2465[regelnummer] Sine ontfermherticheyt es so groet Oatse nieman ghegronden en can; Maer daer op en soude nieman Dencken / diere op dade te mere Hi bleve verloren emmermere. 2470[regelnummer] Vaste ghelove en̄ hope goet Selen wi draghen in onsen moet / En̄ Gode betruwen boven al Dat Hi ons ontfermen sal; En̄ alse wi hebben mesdaen / 2475[regelnummer] Selen wijs rouwe te hant ontfaen / En̄ sal ons van herten wesen leet / En̄ selen te beteren sijn ghereet Met ons prochiaens rade / So vinden wi emmer ghenade 2480[regelnummer] Voer die heylighe oghen Ons Heren. [pagina 221] [p. 221] Lieve kindere / wat mach ic u leren / God kent wel en̄ es gewes Dat menschelike nature cranc es En̄ van naturen gherne sneeft / 2485[regelnummer] En̄ als men dan berouwe heeft So verghevet God ter vaert / Ghelijc ic u vore hebbe verclaert. Wi en moghen alle niet sijn Volmaect alse die inglen fijn / 2490[regelnummer] Oft Sinte Peter / oft Sinte Ian. Ic rade wel elken man Dat hi hem huede van sonden / Ende dat hi peynse tallen stonden Dat die doet naect ende naect 2495[regelnummer] Weder men slaept ofte waect / En̄ een ure niet stille en steet. Die tijt gheet vaste en̄ gheet Tote eens levens eynde. En̄ so scheedt hi van desen elleynde 2500[regelnummer] Met bitterheyden harde groet. Wat bitterheyden es hier vore de doet Hi en werdt ghehoert no ghesien / En̄ haer en mach nieman ontflien. Alle blijscap en ghenuechlijchede / 2505[regelnummer] Rijcheyt / ere en̄ voerheel mede / Diemen te deser werelt mint / Werdt in deser bitterheyt gheint / En̄ wi en weten stat / ure / no dach Waer ons dat ghevallen mach / 2510[regelnummer] Weder int water of opter heyden. God late ons goets tijts verbeyden! [pagina 222] [p. 222] Hi es vroet die hem also beleydt Dat hi des tijts coenlike verbeydt. Ian / God die moets lonen u 2515[regelnummer] Dat ghi mi hebt vertroest nu; Want ic hielt over waerhede Dat die hondertste van kerstenhede Daer niet comen en ware / So dat ic was in groten vare 2520[regelnummer] En̄ in wanhopen te menegher uren; Want dese lereers der Scrifturen Sluten so vaste die dore Met so meneghen slotel daer vore / Dat schijnt dat nieman werdech en waer 2525[regelnummer] Met sijnre verdienten te comene daer. Wouter / dat es emmer waer: Onse verdiente en mochte ons daer Niet bringhen / hoe groet si si; Maer Onse Here / gheloves mi / 2530[regelnummer] Mids sijnre groter goedertierenheyt / Heeft dat hoghe rike bereyt Ter menschen behoef / daer met allen Die inglen wt sijn ghevallen / Die scone en̄ die verweende chore / 2535[regelnummer] Daer sijn de mensche af recht ore. Wi en hebben hier erve no stede; Maer onse vaderlike erfelijchede / Daer men regneert emmermere / Es hier boven met Onsen Here / 2540[regelnummer] En̄ metten heylighen inglen fijn / Daer wi allen toc ghenoedt sijn Daer noch tijt en lijdt noch iaer. Salech sijn si die comen daer! Vorige Volgende